Василий Егоров аан дойду чөмпүйэнээтин рингэтигэр сарсын тахсыаҕа

Бүгүн Германия Гамбург куоратыгар боксаҕа аан дойду чөмпүйэнээтэ саҕаланар. Онно 49 киилэҕэ диэри ыйааһыҥҥа Арассыыйа чиэһин Европа икки төгүллээх чөмпүйүөнэ (2015, 2017), аан дойду 2015 сыллааҕы үрүҥ көмүс призера, Мэҥэ Хаҥалас улууһуттан төрүттээх Василий Егоров көмүскүүр.  

Василий, сэрэбиэй быһаарбытынан, бастакы эргиири көтүтэр буолла, онон рингэҕэ атырдьах ыйын 27 күнүгэр тахсыаҕа. Кини утарылаһааччытынан Алекс Винвуд (Австралия) – Яссин Мохамед (Алжир) киирсиилэрин кыайыылааҕа буолуоҕа.

Саха боксера аан дойду чөмпүйүөнэ Йоаннис Аргилагос (Куба), Рогер Ладон (Филиппин), Жомарт Ержан (Казахстан) курдук күүстээх спортсменнары кытта турнир үөһээҥҥи сеткатыгар түбэстэ. Оттон Олимпийскай оонньуулар үрүҥ көмүс призердара, Америка чөмпүйүөнэ Юберхен Мартинес (Колумбия), Ганхуяг Эрдене (Монголия), Азия чөмпүйүөнэ Хасанбой Дусматов (Узбекистан) алларааҥҥы сеткаҕа бааллар.

Бу ыйааһыҥҥа 27 дойду боксера мэтээл иһин киирсиэҕэ.

Роман Попов, “Саха сирэ” хаһыат