Василий Егоров: «Кыайыыбын тириэньэрим Артур Пахомов сырдык кэриэһигэр аныыбын»

Василий Егоров Оренбурга ыытыллыбыт буоксаҕа Арассыыйа чөмпүйэнээтигэр 52 киилэ ыйааһыҥҥа кыайыы өрөгөйүн биллэ. Кини финалга Новосибирскайтан Ахтем Закировы кыайда.

«Судургута суох киирсии буолла, утарылаһааччым эт-хаан өттүнэн олус күүстээх. Кинини кытта күрэхтэһэргэ тириэньэрдэрбин Геннадий Ковалеву уонна Николай Егоровы кытта эрдэттэн бэлэмнэммиппит. Тактика да, уйулҕа да өттүнэн.

Кыайыыбын тириэньэрим Артур Пахомов сырдык кэриэһигэр аныыбын.

Көрөөччүлэр олус көмөлөстүлэр, чөмпүйэнээти көрө диэн сахалар кэлбиттэр эбит. Күөх экрааннарынан Саха сирэ барыта миэхэ ыалдьарын, биир дойдулаахтарым куруук өйүүллэрин билэбин. Махтанабын!» — диэн Василий СИА кэрэспэдьиэнигэр төлөпүөнүнэн иһитиннэрдэ.

edersaas.ru