Боксер Василий Егоров Арассыыйа чөмпүйэнээтигэр кыттар буолла. Боксаҕа Арассыыйа сүүмэрдэммит хамаандатын сүрүн тириэньэрэ Виктор Фахрутдинов иһитиннэрэринэн, Екатеринбурга ыытыллыбыт аан дойду чөмпүйэнээтигэр миэстэлэспит боксердар дойду чөмпүйэнээтигэр кыттыбаттар.
Аан дойду чөмпүйэнээтигэр Арассыыйа хамаандатын боксердара үс кыһыл көмүс, биир боруонса мэтээли ылары ситиспиттэрэ. Ол курдук, 69 киилэҕэ диэри ыйааһыҥҥа Андрей Замковой, 75 киилэҕэ диэри ыйааһыҥҥа Глеб Бакши уонна 91 киилэҕэ диэри ыйааһыҥҥа Муслим Гаджимагомедов бастаабыттара, үһүс миэстэҕэ 91 киилэҕэ диэри ыйааһыҥҥа Максим Бабанин буолбута.
«Чөмпүйэнээккэ үчүгэйдик кытынныбыт, хамаанданан бастыырга кыра тиийбэтэ быһыылаах. Аны Олимпиада күүтэр. Арассыыйа чөмпүйэнээтэ буолуоҕа, манна аан дойду чөмпүйэнээтин призердара уонна чөмпүйүөннэрэ кыттыбаттар«, — диир Фахрутдинов.
Тириэньэр бу тылларын Василий Егоров уонна кини тус тириэньэрэ Артур Пахомов бигэргэттилэр.
«Василий Егоров аан дойду чөмпүйэнээтин призердарын иһигэр киирбэтэ. Кини сүүмэрдэммит хамаанда бары чилиэннэрин курдук Арассыыйа чөмпүйэнээтигэр бэлэмнэниэҕэ. Самараҕа ыытыллар Арассыыйа чөмпүйэнээтигэр Василий 52 киилэҕэ диэри ыйааһыҥҥа күрэхтэһиэҕэ«, — диир Артур Иннокентьевич.
Арассыыйа чөмпүйэнээтэ сэтинньи 8-17 күннэригэр Самараҕа ыытыллыаҕа.