Москваҕа Бокс күнүн бырааһынньыктааһын киин сабыытыйатынан Арассыыйа уонна Германия сүүмэрдэммит хамаандаларын икки ардыларыгар табаарыстыы көрсүһүү буолла. Төһө да от ыйын 22-гэр сөрүүн, силбиктээх күн турдар, Манежнай болуоссакка сүүрбэччэ тыһыынча көрөөччү муһунна.
Күрэстэһии 7:2 ахсаанынан рингэ хаһаайыттарын туһаларыгар түмүктэннэ. Арассыыйа сүүмэрдэммит хамаандатыттан Василий Егоров (49 киилэҕэ диэри), Тамир Галанов (52 киилэ), Шахриер Ахмедов (56 киилэ), Альберт Батыргазиев (60 киилэ), Павел Федоров (64 киилэ), Владислав Савостьянов (69 киилэ), Глеб Бакши (75 киилэ), Георгий Кушиташвили (81 киилэ) итиэннэ Илья Квасников (91 киилэттэн үөһэ) кииристилэр. Германия чиэһин рингэҕэ Кристофер Гоман, Хамза Тоуба, Омар Эль Хаг, Артур Брил, Владислав Барышник, Паул Волл, Зелимхан Дадаев, Аханасиос Казакиз уонна Нелвие Тиафак көмүскээтилэр.
Саха боксаҕа оскуолатын иитиллээччитэ Европа икки төгүллээх чөмпүйүөнэ, аан дойду үрүҥ көмүс призера (2015 с.) Василий Егоров эдэр утарылаһааччытын, Германияҕа бастыыр иһин күрэхтэһиилэр түөрт төгүллээх кыайыылаахтарын Кристофер Гоманы баһыйа тутта.
Роман Попов, edersaas.ru