Бүгүн, кулун тутар 29 күнүгэр, бырабыыталыстыба 2-с №-дээх дьиэтигэр «Саха сирин эдэр тутааччыларын ассоциацията» өрөспүүбүлүкэтээҕи уопсастыбыннай тэрилтэ кэмпириэнсийэтэ буолла. Мунньахха ассоциация бэрэсидьиэнинэн куоластааһынынан «Горизонт» ХЭТ генеральнай дириэктэрин солбуйааччы, «МАРСЕЛЬ» миэбэл оҥорор хампаанньаны салайар Василий Данилов талылынна.
2009 сыллаахтан Саха сирин тутааччыларын ассоциациятын бэрэсидьиэнэ Иннокентий Сивцев иилээн-саҕалаан ыытта. Ыҥырыылаах ыалдьыттарынан СӨ архитектуратын уонна тутуу комплексын миниистирин бастакы солбуйааччы Павел Аргунов, СӨ элбэх кыбартыыралаах дьиэлэрин хапытаалынай өрөмүөнүн Фондатын дириэктэрэ Влад Пермяков уонна эдэр тутааччылар ассоциацияларын чилиэннэрэ сырыттылар. Мунньах биэс кэрдииһинэн барда. Бастатан туран, Иннокентий Сивцев ассоциация ыыппыт үлэтин сырдаппыта ыалдьыттарга уопсастыбыннай тэрилтэ сыалын-соругун арыйда. Иккиһинэн, ассоциация чилиэннэрин таллылар. Урукку састааптан улахан уларыйыы киирбэтэ. Мунньах үһүс хаамыытынан ассоциация бэрэсидьиэнин талыы буолла. Бастакы хандьыдаатынан Василий Данилов турда. Эдэр тутааччылар этии киллэрэн, «Сахатранснефтегаз» үлэһитэ Иван Архипов иккис хандьыдаат буолла. Куоластааһын түмүгүнэн, Василий Даниловы кэмпириэнсийэ кыттыылаахтарын улахан аҥаара өйөөн, «Саха сирин эдэр тутааччыларын ассоциациятын» бэрэсидьиэнэ буолла. Маны таһынан, вице-бэрэсидьиэни уонна ревизиялыыр хамыыһыйа чилиэннэрин таллылар.
Василий Данилов 1986 сыллаахха Таатта улууһун Чымнаайы бөһүөлэгэр төрөөбүтэ. 2010 сыллаахха М.К. Аммосов аатынан ХИФУ Инженернэй факультетын бүтэрбитэ.
- 2010-2011 сс. СӨ ыччат бэлиитикэтин министиэристибэтигэр сүрүн исписэлиис
- 2011-2013 сс. СӨ ыччат уонна спорт министиэристибэтин сүрүн исписэлииһэ
- 2013-2017 сс. СӨ ыччат дьыалатын уонна дьиэ кэргэн бэлиитикэтин министиэристибэтигэр үлэлээбитэ
- 2017 сыл атырдьах ыйыгар диэри СӨ ыччат дьыалатын уонна дьиэ кэргэн бэлиитикэтин министиэристибэтигэр отдел салайааччыта
Билигин Василий «Горизонт» ХЭТ генеральнай дириэктэрин солбуйааччыта, «МАРСЕЛЬ» миэбэл оҥорор хампаанньа салайааччыта.
Василий Данилов, «Саха сирин эдэр тутааччыларын ассоциациятын» бэрэсидьиэнэ:
— Миигин «Саха сирин эдэр тутааччыларын ассоциацията» өрөспүүбүлүкэтээҕи уопсастыбыннай тэрилтэ бэрэсидьиэнинэн талбыттарыгар Саха сирин эдэр тутааччыларыгар, салайааччыларыгар махтанабын. Тутуу, салайыы эйгэтигэр үлэлээбит үөрүйэхтээхпин. Үлэлиир да баҕа баар. Саха сирин тутааччылара бары бииргэ түмсэммит элбэх үлэни ыытыахпыт, туруоруммут сыалбытын-сорукпутун тиһэҕэр тиэрдиэхпит диэн эрэннэрэбин».
Иннокентий Сивцев, «Саха сирин эдэр тутааччыларын ассоциациятын» 2009-2018 сс. бэрэсидьиэнэ:
— «Саха сирин эдэр тутааччыларын ассоциацията» эдэр тутааччылары түмэр сыаллаах тэриллибитэ. Биһиги санаабытыгар, үчүгэй тутааччы үлэтин таһынан уопсастыбыннай үлэҕэ көхтөөхтүк кыттар буолуохтаах. Манна уопсастыба сайдыытыгар кыһаллар дьон киирэллэр. Василий Даниловы Саха сирин эдэр тутааччыларын ассоциациятын бэрэсидьиэнэ буолбутунан эҕэрдэлиибин».
Николай ПОПОВ, «Саха сирэ» хаһыат, edersaas.ru