Василий Бурцев «Эр санаа» уордьанынан наҕараадаланна

Ааптар: 
Бөлөххө киир:

Былырыын алтынньы 18 күнүгэр Муома улууһун Сааһыыр сэлиэнньэтигэр  полиция участковай боломуочунайа Василий Бурцевы үлэлиир сиригэр баламаттык өлөрбүттэрэ. Бу дьыала туһунан биһиги сайтпыт сиһилии хаста да суруйан турар.

edersaas.ru

Бүгүн, тохсунньу 24 күнүгэр, СӨ Ис дьыала министиэристибэтин киэҥ ыҥырыылаах коллегиятыгар миниистир, полиция генерал-майора Владимир Прокопенко Василий Бурцев огдообото Айталы Сергееваҕа Российскай Федерация судаарыстыбаннай наҕараадатын — «Эр санаа» уордьанын — туттарда.

Бу туһунан СӨ ИДьМ-тын пресс-сулууспата иһитиннэрдэ.

Санатар буоллахха, силиэстийэ уорганнара бу чахчынан РФ Холуобунай кодексатын 317-с ыстатыйатынан, ол эбэтэр, быраабы араҥаччылыыр уорган сотруднигын олоҕор суудайыы бэлиэтэ баарынан холуобунай дьыала тэрийбиттэрэ. 51 саастаах, түөрт оҕолоох участковай боломуочунай Василий Бурцевы быһаҕынан хаста да түөскэ анньан өлөрбүт уорбаланааччыны норуот дружинниктара туппуттара. Дьиҥнээх өлөрүөхсүтү, ити күн сарсыардатыгар дьиэтигэр бэйэтигэр тиийиммитин булбуттара. Оттон полицейскайы өлөрүүгэ кыттыгастаах Ефимов 18 сылга кытаанах эрэсиимнээх холуонньаҕа көҥүлэ быһыллыбыта.

2017 сыл сэтинньи 10 күнүттэн полиция капитана Василий Васильевич Бурцев кэриэһигэр чугас дьоно «За верность служебному долгу» диэн бириэмийэ олохтообуттара.

Бу бириэмийэни полицейскай аатын үйэтитэр, участковайдар үлэлэрин сыаналаан болҕомто ууралларын туһугар, үүнэр көлүөнэҕэ үтүө холобур буоллун диэн олохтообуттара.

Бириэмийэ өрөспүүбүлүкэ кытыы сиригэр үлэлиир бастыҥ үлэлээх участковайдарыгар сылын аайы туттарыллар.

Ону таһынан, Василий төрөөбүт дойдутун, Уус Алдан улууһун Сыырдаах сэлиэнньэтин, орто оскуолатын бастыҥ выпускнигар маннык бириэмийэни эмиэ туттарыахтара.

Бастакы бириэмийэни Уус Алдан улууһун участковайа, полиция майора Юрий Мамонтовка туттарбыттара.

Вера МАКАРОВА, «Саха сирэ» хаһыат, edersaas.ru

Хаартыска: СӨ ИДьМ-тын пресс-сулууспата.

+1
0
+1
0
+1
0
+1
0
+1
0
+1
0
+1
0