Бэриниилээх ааҕааччыбыт өйдүүр буолуохтааххын: былырыын алтынньы 18 күнүгэр Муома улууһун Сааһыыр сэлиэнньэтигэр полиция участковай боломуочунайа Василий Бурцевы үлэлиир сиригэр баламаттык өлөрүү тахсыбытын.
Санатар буоллахха, силиэстийэ уорганнара бу чахчынан РФ Холуобунай кодексатын 317-с ыстатыйатынан, ол эбэтэр, быраабы араҥаччылыыр уорган сотруднигын олоҕор суудайыы бэлиэтэ баарынан холуобунай дьыала тэрийбиттэрэ. 51 саастаах, түөрт оҕолоох участковай боломуочунай Василий Бурцевы быһаҕынан хаста да түөскэ анньан өлөрбүт уорбаланааччыны норуот дружинниктара туппуттара. Уорбаланааччы урут киһини ыараханнык эчэтэн, сууттана сылдьыбыт киһи эбит. Иккиһин, дьиҥнээх өлөрүөхсүтү, ити күн сарсыардатыгар дьиэтигэр бэйэтигэр тиийиммитин булбуттара. Полицейскай Бурцевы олохтоохтор үтүө эрэ тылларынан ахталлар…
Бу дьыала СӨ Үрдүкү суутугар от ыйыгар көрүллэн, буруйдаах сууттаммыта. Суут уурааҕынан, Н. участковайы быһаҕынан анньар кэмигэр тутан турбут киһи, ол эбэтэр, өлөрүүгэ кыттыгастаах Ефимов 18 сылга кытаанах эрэсиимнээх холуонньаҕа көҥүлэ быһыллыбыта. Манна эбии 2 сылга көҥүлэ хааччахтанар итиэннэ 1 мөл. солк. суумалаах моральнай хоромньу төлүөхтээх.
Сулууспатын эбээһинэһин толоро сылдьан суорума суолламмыт полиция капитана Василий Васильевич Бурцев кэриэһигэр чугас дьоно «За верность служебному долгу» диэн бириэмийэ олохтообуттар.
Айталы Сергеева, Василий Бурцев огдообото:
– Маннык бириэмийэни биһиги аҕабыт аатын үйэтитэр, участковайдар үлэлэрин сыаналаан болҕомто ууралларын туһугар, үүнэр көлүөнэҕэ үтүө холобур буоллун диэн олохтоотубут. Бириэмийэ өрөспүүбүлүкэ кытыы сиригэр үлэлиир бастыҥ үлэлээх участковайдарыгар сылын аайы туттарыллыаҕа.
Ону таһынан, Василий төрөөбүт дойдутун, Уус Алдан улууһун Сыырдаах сэлиэнньэтин, орто оскуолатын бастыҥ выпускнигар маннык бириэмийэни эмиэ туттарыахпыт.
Бастакы бириэмийэни биэс кандидатураттан талан, Уус Алдан улууһун участковайа, полиция майора Юрий Мамонтовка туттардыбыт.
Вера Макарова, «Саха сирэ» хаһыат, edersaas.ru
Хаартыскаларга: Василий Бурцев кыыһа, огдообото, бастыҥ участковай Юрий Мамонтов.