Алтынньы 11 күнүгэр А.Пушкин аатынан Национальнай бибилэтиэкэ Историческай саалатыгар Василий Бочкарев «Кэм-кэрдии уонна олоҕум» кинигэтин нууччалыы тылбааһа сүрэхтэннэ.
edersaas.ru
Ааптар 2017 с. тахсыбыт кинигэтэ аны нууччалыы тылбааһа күн сирин көрөрүгэр суруйааччылар, тылбаасчыттар Галина Томская-Айыына, Ираида Попова, Эдуард Пономарев үлэлэстилэр. Кинигэ таһын худуоһунньук Михаил Старостин уруһуйдаата. СӨ норуодунай бэйиэтэ Иван Мигалкин: «Үтүө киһи үлэтин үтүө дьон тылбаастаан, үтүө кинигэ буолла», – диэн үрдүктүк сыаналаата уонна ааптар олоҕу кырааскалаан буолбакка, хайдах баарынан суруйарын бэлиэтээтэ.
«Кэм-кэрдии уонна олоҕум» диэн дьоһуннаах кинигэҕэ ааптар оҕо сааһыттан саҕалаан, оччолорго скульптор курдук сахаҕа сэдэх идэни талбытын, айар үлэһит чэпчэкитэ суох олоҕун, ону тэҥэ, үөрүүтүн, доҕотторунуун алтыһыытын киһи эрэ ааҕан бара туруох курдук умсугутуулаахтык суруйбута.
х х х
Василий Бочкаревы улахан үлэтэ күн сирин көрбүтүнэн эҕэрдэлии скульптордар, худуоһунньуктар, суруйааччылар, бииргэ үөрэммит доҕотторо, биир идэлээхтэрэ, аймахтара, биир дойдулаахтара уонна кини талааныгар сүгүрүйээччилэр кэллилэр.
Кинигэ сүрэхтэниитин Национальнай бибилэтиэкэ үлэһитэ Лариса Кычкина истиҥ иэйиилээхтик ыытта.
СӨ Судаарыстыбаннай Мунньаҕын (Ил Түмэн) спикерэ Петр Гоголев:
«Бүгүн Василий Васильевич кинигэтинэн сиэттэрэн, ааспыты санаһыы, өйдөтүһүү уонна инникигэ суол солооһун курдук үтүө түгэн буолла. Кини бэйэтэ, кини личноһа, талаана саха дьонун баайынан-дуолунан буолар. Кини саха норуотун чулуу дьонун ааттарын үйэтитэригэр, олорон ааспыт дьон олоҕун дьоҥҥо-сэргэҕэ тириэрдэригэр махтанан, киниэхэ сүгүрүйэрбит ирдэниллэр. Мин бэйэм орто саастаах киһи буоларым быһыытынан, итини толору өйдүүбүн. Онон, Василий Васильевич үлэлэрин ыччаттарбытыгар кэпсии-ипсии сылдьыаҕыҥ», – диэн СӨ искусствотын үтүөлээх диэйэтэлэ, скульптор, суруйааччы, суруналыыс Василий Бочкарев кинигэлэрэ, скульптуралара бар дьонугар туһалыы сылдьалларын курдук, бэйэтэ эмиэ доруобай сылдьан, өссө даҕаны айа-тута сылдьарыгар баҕа санаатын тириэртэ.
Литэрэтиирэ кириитигэ Саргылана Ноева суруйааччы уус уран айымньылара, очеркалара тыа сирин олоҕун-дьаһаҕын, айар интеллигенцияны арыйар күүстээхтэрин (чуолаан, саха интеллигенциятын уратытын көрдөрөллөрүн) бэлиэтээтэ.
СӨ искусствотын үтүөлээх деятелэ Зинаида Унарова-Иванова, кини олус элбэх биллиилээх дьону кытары доҕордоһорун, чугастык алтыһарын билэн сөхпүтүн уонна астыммытын, скульптор быһыытынан саҥа көлүөнэ скульптордары иитэн таһаарбыт өҥөлөөҕүн тоһоҕолоон эттэ.
Национальнай художественнай мусуой дириэктэрин солбуйааччы Галина Неустроева, мусуой ыстаарсай научнай үлэһитэ Ефросинья Ноговицына, Уус Алдан улууһун култуураҕа управлениетын начаалынньыга Иннокентий Аммосов уо.д.а эҕэрдэлэрин тириэртилэр.
Бибилэтиэкэ үлэһитэ Туйаара Готовцева бу күн дьон-сэргэ сэҥээриитин ылбыт быыстапканы билиһиннэрдэ.
ххх
Саха норуодунай бэйиэтэ Семен Руфов кыыһа Татьяна Семеновна уонна Валерий Семенович кинилэргэ аҕаларын, убайдарын тэҥэ буолбут Василий Бочкаревка махтал тылларын тириэртилэр. Татьяна Семеновна В.Бочкарев кинилэр аҕаларын бюһун, оттон худуоһунньук Степан Васильев «Поэт уонна муза» диэн мэтириэти хайдах оҥорбуттарын кэлбит дьоҥҥо сиһилии кэпсээтилэр. Манна сыһыаран эттэххэ, В.Бочкарев Семен Руфов мэтириэтин боруонсаҕа түһэрбитэ (ону оҕолоро Национальнай художественнай мусуойга бэлэхтээбиттэрэ), ону сэргэ, Руфовтар көмүс уҥуохтарыгар барельебы оҥорбута. Татьяна Семеновна убаастыыр киһитэ Василий Бочкарев айымньыларын сахалыы Викидепияҕа киллэрэригэр сүбэлээтэ. Валерий Руфов уус алданнарга махтанан туран, Чэриктэй бибилэтиэкэтигэр аҕаларын кинигэлэрин бэлэх уунна.
Биир кэмҥэ устудьуоннуу сылдьыбыт чугас доҕоро, СӨ норуодунай артыыһа Иван Степанов, хомусчут Алдан Рожин уо.д.а. кэлбит дьоҥҥо ырыа, хоһоон киэһэтин бэлэхтээтилэр.
Надежда ЕГОРОВА, «Саха сирэ» хаһыат, edersaas.ru
Эдуард ПОНОМАРЕВ хаартыскаҕа түһэриилэрэ