Василий Афанасьев: «Таймылыырга ас табаара толору тиийиэҕэ»

Бөлөххө киир:

Социальнай ситимнэргэ бу күннэргэ Булуҥ улууһун Таймылыыр сэлиэнньэтин маҕаһыыннарыгар ас-үөл, киһи олоҕор наадалаах табаардар бүтэн эрэллэрин туһунан иһитиннэрии тарҕаммыта. Бу кыһалҕа тула СӨ Тыатын хаһаайыстыбатын миниистирин солбуйааччы Василий Афанасьев иһитиннэрии таһаарда.

—Уу суола баар кэмигэр Таймылыырга 39,5 туонна социальнай суолталаах бородуукта, ол иһигэр 19,9 туонна бурдук тиийбитэ. Бу ас кыһыҥҥы уу суола туруор диэри тиийиэхтээх этэ. Хаалбыт таһаҕаһы кыһыҥҥы суолунан илдьэргэ былааннаабыппыт. Ол эрээри, быйыл кыһын саҕаланыыта наһаа сылаас буолан, өрүс мууһа сөптөөх халыҥҥа диэри тоҥмокко, таһаҕас сатаан барбатаҕа. Ону таһынан, бэйэни хааччахтаныы эрэсиимэ биллэриллэн, уоппускаттан тахсар дьон уонна устудьуоннар киириилэрэ-тахсыылара аҕыйаан, ас тиийбэккэ турбута.

Онон билигин, Анаабыр улууһун Сааскылаах сэлиэнньэтиттэн 3,8 туонна социальнай суолталаах бородууктаны киллэрэргэ диэн быһаарыныы ыллыбыт. СӨ Тыатын хаһаайыстыбатын министиэристибэтин аатыттан Анаабыр улууһун баһылыгар Иван Иванович Семеновка уонна муниципальнай унитарнай тэрилтэ дириэктэригэр Сергей Александрович Быковка ыаллыы сытар улуустарыгар ыксаллаах түгэҥҥэ көмө буолбуттарыгар улахан махталбын тиэрдэбин.

Ону таһынан, Тиксииттэн эбии рейстэри көтүтэр быһаарыныыны ырыта сылдьабыт. Олохтоохтору ыксаабаккытыгар ыҥырабын, Таймылыырга ас табаара толору тиийиэҕэ.

СӨ Тыатын хаһаайыстыбатын министиэристибэтин пресс-сулууспата.

+1
0
+1
0
+1
0
+1
0
+1
0
+1
0
+1
0