Санатар буоллахха, ааспыт нэдиэлэҕэ социальнай ситимнэргэ Булуҥ улууһугар ас-үөл, социальнай суолталаах табаардар бүтэн эрэллэрин туһунан иһитиннэрии тарҕаммыта. Бу түбэлтэҕэ Анаабыр улууһун Сааскылаах сэлиэнньэтиттэн 3,8 туонна социальнай суолталаах аһы-үөлү киллэрэргэ диэн быһаарыныы ылбыттара. Билигин кыһалҕа быһаарылынна дуо?
edersaas.ru
СӨ тыатын хаһаайыстыбатын миниистирэ Василий Афанасьев ахсынньы 17 күнүнээҕи онлайн-мунньахха бу кыһалҕаны маннык быһаарда:
—Манна буруйдаах суох, тоҕо диэтэххэ, араас төрүөттэр үөскээбиттэрэ. Булуҥ улууһун экэнэмиистэрэ күһүн оҥорбут сайаапкаларынан, уу суолунан барбыт табаар кээмэйэ кыһыҥҥы суол туруор диэри тиийиэхтээх этэ. Ол эрээри, хамсыгынан сибээстээн, быйыл устудьуоннар, уоппускалаахтар дойдуларыгар хааланнар ас-үөл тиийбэтэ, ол иһигэр, мас арыыта, гречка, ириис. Сайаапкаҕа этиллибит кээмэйи, ол эбэтэр 12 туонна табаары, аһы-үөлү ыыппыппыт.
Билигин уопсайа, 25 мөлүйүөн 478 тыһыынча солкуобай суумаҕа 24 туонна ас-үөл Арктика улуустарыгар бараары турар. Ол иһигэр, оҕуруот аһа, фрукта, хортуоска, халбаһыы о.д.а., бырааһынньыктааҕы остуолга ууруллар астар. Бастаан, 11 рейс сөмөлүөтүнэн хоту улуустар кииннэригэр оҥоһуллуоҕа. Онтон кииннэртэн 15 бөртөлүөт рейсэтэ оҥоһуллуоҕа. Бэҕэһээ сөмүлүөт бастакы рейсэ Тиксиигэ көппүтэ. Бүгүн Тиксииттэн Таймылыырга бөртөлүөт көтүөхтээх. Санатан этэр буоллахха, билигин даҕаны Таймылыырга өрүс тааннаан, суол тура илик.
Ахсынньы 29 күнүгэр диэри бары рейстэр оҥоһуллуохтаахтар.