Сунтаардааҕы Ис дьыала салаата сыл ахсын нэһилиэнньэҕэ аһымал-кэнсиэртэри ыытар үгэстээх. Быйылгы тэрээһиннэрин тутулун арыый да уларытан, күрэх быһыытынан ыыттылар.
Мария Кобельянова-Тускулаана, «Эдэр саас»
Тыа сирин үлэһиттэрин сылыгар анаан улуус баһылыга А.В.Григорьев 25 салааҕа арааран граннары олохтообута. Бу сырыыга полиция күнүгэр сөп түбэһиннэрэн, бастыҥ үлэлээх полиция үлэһитигэр грант туттарылынна. Алтынньыттан саҕалаан, Ис дьыала отделын иһинэн хас биирдии салааттан аҕыс бастыҥ көрдөрүүлээх үлэһиттэр талыллыбыттара. Бастакы түһүмэххэ, эт-хаан өттүнэн төһө эрчиллиилээхтэрин көрдөрбүттэрэ уонна сокуону билиигэ тургутууну ааспыттара. Мантан биэс чаҕылхай полицейскай талыллыбыттара.
Иккис түһүмэххэ нэһилиэнньэ көрүүтүгэр бэйэлэрин үлэлэрин билиһиннэрдилэр, байыаннай түһүмэххэ бэстилиэти ыстылар-хомуйдулар, экипировкаларын таҥыннылар, онтон үһүс түһүмэххэ талба талааннарын көрдөрдүлэр.
Оттон кыттааччылар тустарынан кыратык сырдаттахха, Виктор Иванов – ИВС үлэһитэ, полиция младшай сержана. Бу соторутааҕыта үлэлии кэлбит диэтэххэ, үлэтигэр бэриниилээҕэ тута харахха быраҕыллар. Бэйэтин туһунан билиһиннэрэригэр дьиэ кэргэнинэн сахалыы таҥнан тахсыбыттара. Уонна талан ылбыт идэтигэр сыал туруорунан үлэлии-хамсыы сылдьарын кэпсээтэ. Талааны көрдөрүү түһүмэҕэр, гитаранан ыллаан, элбэх дьон кутун тутта.
Иван Афанасьев – штаб иниспиэктэрэ, полиция младшай лейтенана. Дьыаланы толорууга, отчуот оҥорууга биир бастыҥ үлэлээх киһинэн буолар. Аатырбыт Тарбаахап курдук асчыт талааннааҕынан сөхтөрдө.
Никита Данилов – ДПС иниспиэктэрэ, полиция лейтенана. Күннээҕи үлэтин хаамыытын видеосюжет быһыытынан көрдөрдө. Никита дуэтынан тахсан ыллаан, үгүс киһи сэҥээриитин ылла.
Петр Горохов – экэнэмиичэскэй буруйу оҥорууну утары үлэлиир полиция үлэһитэ, полиция хапытаана. Бииргэ үлэлиир үөлээннээхтэрин кытта үлэлэрин сүрүн тутулун видеонан көрдөрдүлэр. Хайдах бу идэҕэ үлэлии кэлбитин туһунан бэркэ кэпсээн, талаан түһүмэҕэр «Көмүс далбарым» диэн мааны ырыаны бэлэх уунна.
Оттон бастыҥ ааты ылбыт Василий Пахомов – Сунтаар нэһилиэгин участковай-уполномоченнайа, полиция хапытаана. Бэйэтин билиһиннэриитигэр үс оҕотунуун, кэргэнэ Анналыын сахалыы сайбаччы таҥнан таҕыстылар. Байыаннай түһүмэххэ барытын 15 сөкүүндэ иһигэр толору оҥорон, барыларын кэннигэр хаалларда. Оҕолорунуун уонна кэргэнинээн вальс үҥкүүлээн дьону үөртэ.
Бу түһүлгэҕэ сылдьыбыт дьон, уолаттар бастыҥ үлэһит эрэ буолбакка, бастыҥ дьиэ кэргэн аҕа баһылыктара буолалларын уонна талба талааннаахтарын сөхтүбүт.
Маны таһынан, полиция бары үлэһиттэрин, Тойбохойдооҕу оҕо дьиэтин иитиллээччилэрин, Уопсастыбаннай Сэбиэт көмөтүнэн тэриллибит кэнсиэргэ ырыа арааһын истэн, үҥкүү бастыҥын көрөн олус астынныбыт. Кэнсиэргэ киирбит үп-харчы бу күннэргэ Тойбохойдооҕу оҕо дьиэтигэр көмө быһыытынан барыаҕа.
Мария КОБЕЛЬЯНОВА-ТУСКУЛААНА, «Эдэр саас» сайтка анаан