Бүгүн, ахсынньы 2 күнүгэр, Өлөөн эбэҥки национальнай оройуонугар түргэн интэриниэт холбонно. Оройуон олохтоохторо өр күүппүт күннэрэ үүнэн, үөрүүлэрэ муҥура суох.
Бу туһунан Өлөөн сэлиэнньэтин баһылыгын солбуйааччы Христофор Васильев санаатын үллэстэр:
— Оройуоммутугар ВОЛС ситимэ кэлэн, түргэн интэриниэккэ холбоммуппутуттан олохтоохтор үөрүүбүт муҥура суох. Биһиэхэ Ил Дархаммыт Айсен Николаев ыалдьыттаан, үөрүүлээх тэрээһиҥҥэ эҕэрдэлээтэ. Дьон-сэргэ олус күүппүт күммүт дьэ үүнэн, кыралыын-улаханныын бары сүргэбит көтөҕүллэн сылдьабыт.
Оптическай лиинийэ ситимэ салгыы Анаабыр улууһун диэки «Өлөөн — Дьилиҥдэ — Сааскылаах — Үрүҥ Хайа» хайысханан тардыллыаҕа. Маныаха бүгүн Ил Дархан Айсен Николаев, Өлөөн баһылыга Лена Иванова, Анаабыр баһылыга Иван Семенов уонна «Ростелеком» Уһук Илиҥҥи филиалын дириэктэрэ Александр Логинов сөбүлэһиигэ илии баттаатылар.
Маны сэргэ түргэн интэриниэти кытта Мегафон хампаанньа 4G сибээһэ кэллэ.
Саҥа сибээс холбонон, оройуоммутугар сайдыы барыаҕа диэн бигэ эрэллээхпит. Билигин Өлөөҥҥө уонна Харыйалаахха социальнай суолталаах эбийиэктэргэ интэриниэт киирдэ, сыыйа 1000 дьиэҕэ холбуохтара. Өлөөн сэлиэнньэтигэр 2019 сыллааҕы дааннайынан 2276 киһи олорор.
edersaas.ru