Дария Скобелева генеральнай дириэктэрдээх «Офсет» кинигэ кыһатыгар саха бастакы дьахтар бэйиэтэ Варвара Потаповаҕа аналлаах икки кинигэ таҕыста.
Бу үөрүүлээх түгэҥҥэ анаан бэҕэһээ, кулун тутар 20 күнүгэр, «Офсет» ааҕааччыларга анаан кинигэ биһирэмин тэрийдэ. Үгүс киһи мустан, киэҥ кэпсэтии тэнийдэ. Кинигэни бэлэмнээн таһаарбыттарга СӨ Ил Түмэниттэн, СӨ култуураҕа министиэристибэтиттэн уо.д.а. тэрилтэлэртэн эҕэрдэ суруктары, бэлэхтэри туттардылар. Дьоро киэһэни кэрэ куоластаах, кэрэ кэпсэллээх ыытааччылар Яна Байгожаева, Эдуард Рудых киэргэттилэр. Саха норуотун тапталлаах ырыаһыттара Хатылаевтар этно-бөлөхтөрө, кэргэннии Егоровтар дуэттара, Игорь Егоров ырыаларын дьон сэргэ кэрэхсээн иһиттилэр.
Варвара Потапова бастакы кинигэтигэр хоһоонноро бэчээттэммиттэрэ. Саха ааҕааччылара үөрэ көрсүбүттэрэ, кинигэ бэрт түргэнник бүппүтэ. Иккис кинигэ бастакы түһүмэҕэр Варвара Потаповаҕа анаммыт хоһооннор, поэмалар киирдилэр. Анабыллары саха биллиилээх суруйааччылара, Варвара Потапова көлүөнэтин бэйиэттэрэ уонна билиҥҥи айааччылар суруйбуттар. Ол барыта 70 хоһоон, 4 поэма буолбут. Иккис түһүмэххэ Варя туһунан ахтыылар киирдилэр. Күн сиригэр бэрт кылгастык олорбут Варя Потапова трагическай дьылҕатын туһунан ахтыылар үгүстэр. Саха биллиилээх суруйааччылара А.Сыромятникова, В.Гаврильева, Н.Харлампьева, С.Тарасов, И.Мигалкин уо.д.а. ахтыылара киирбиттэр. Бэйиэт кыыс көлүөнэтин дьоно, доҕотторо А.Старостин, В.Бочкарев улахан ахтыы-сэһэннэрэ бэчээттэммит. СӨ норуодунай артыыһа З.П.Багынанова дьиэ кэргэнинэн Варвара Потапова аатын тилиннэриигэ, үйэтитиигэ үлэлээбиттэрин туһунан кэпсээнэ бэрт кэрэхсэбиллээх буолбут.
Дьоро киэһэҕэ бэйиэттэр И.Мигалкин, Саргы Куо, Айыына, Суоһааны, Дьолуолаах уо.д.а. В.Потаповаҕа анабыл хоһооннорун аахтылар. «Ньурба уоттара» литературнай түмсүү салайааччыта Д.Пономарев-Дьолуолаах Ньурбаҕа В.Потаповаҕа, Дмитрий Наумов Үөһээ-Бүлүүгэ Бүөтүр Тобуруокапка аналлаах «Көмүс күһүннэргэ» айар дьону бука барыларын ыҥырдылар. Онон дьоро киэһэ бэрт үчүгэй тэрээһиннээхтик ыытыллан, чахчыта да, саха Бэйиэсийэтин бырааһынньыга буолла.
Варвара Окорокова, филологическай наука дуоктара.