Варшаватааҕы киинэ бэстибээлигэр өссө биир киинэ анал наҕараадаҕа тигистэ
«Ыт» диэн Дмитрий Давыдов уонна Степан Бурнашев уһулбут киинэлэрэ Варшаваҕа 37-с төгүлүн ыытыллар киинэ бэстибээлигэр дьүүллүүр сүбэ анал наҕараадатыгар тигистэ.
ТАСС иһитиннэрбитинэн, бу киинэ араас дойдуттан кыттыбыт 15 бастыҥ киинэҕэ киллэриллибит. Сүрүн бирииһи уонна статуэтканы Богдан Джордж Апетри Румыния, Чехия уонна Латвия холбоһуктаах уһулбут «Чудо» (2021) диэн киинэтэ ылбыт. Аан бастаан кыттар эдэр режиссердар үлэлэригэр Арассыыйаттан Александр Хант «Межсезонье» (2021) драмата бэлиэтэммит.
Варшаватааҕы киинэ бэстибээлэ 1985 сылтан саҕаламмыт. Киинэ продюсердарын норуоттар икки ардыларынааҕы ассоциацияларын федерацията 2009 сыллаахха Польша киинэҕэ бэстибээлигэр «А» категорияны биэрбит. Маннык бочуоттаах лигаҕа аан дойду 15 бастыҥ тэрээһинэ киллэриллибит. Варшаватааҕы тэрээһинин таһынан, Канны, Берлин, Венеция, Сан-Себастьян, Локарно, Карловы Вары, Токио, Таллин, Монреаль, Шанхай, Мар-дель-Плата, Каир, Гоа уонна Москва бэстибээллэрэ киирэллэр.
+1
+1
+1
+1
+1
+1
+1