Балаҕан ыйын 5 күнүттэн Саха сиригэр «Амарах сүрэх» ааксыйа саҕаланна. Ыарыһах оҕолорго үп-харчы хомуйар ааксыйаҕа ким баҕалаах кыттыһыан сөп. edersaas.ru
Бастакы ааксыйа Мэҥэ Хаҥалас улууһунааҕы киин балыыһа реаниамацияҕа отделениетыгар эмтэнэ сытар Ваня Оконешниковка ананар.
13 саастаах Ваняҕа «Внебольничная плевропневмония. Дыхательная недостаточность 2-3 степени с левосторонним экссудативным плевритом» диэн уустук диагноз туруоруллубут.
Уолчаан дьиэтигэр туттарыгар тыҥатыгар искусственнай вентиляцияны оҥорор 1 мөлүйүөн кэриҥэ сыаналаах медицинскэй тэрили атыылаһыахха наада.
Эһиги ыыппыт харчыгыт барыта «Харысхал» аһымал пуонда счетугар киириэҕэ. Наадалаах суума хомулуннаҕына, пуонда тута ити аппарааты атыылаһан Ваня төрөппүттэригэр биэриэ.
Ааксыйа өрөспүүбүлүкэ кылаабынай эрэдээктэрдэрин сэбиэтин, СӨ Сибээскэ уонна иһитиннэрэр технологияларга министиэристибэтин, СӨ Доруобуйа харыстабылын министэриэстибэтин, «Харысхал» аһымал пуонда, «SOS-дети Якутии» уопсастыбаннай хамсааһын уонна сонуну киэҥник тарҕатар сүрүн уорганнар өйөбүллэринэн ыытыллар.
Якутия диэн тылы суруйан баран, көтүтүү кэнниттэн көмөҕө оҥорор суумаҕытын ыйан 3443 кылгас нүөмэргэ иһитиннэрии ыытыаххытын сөп.
Ванюшаҕа бары биир санаанан көмөлөһүөҕүҥ!
Надежда ЕГОРОВА, «Саха сирэ» хаһыат, edersaas.ru