Валуев: Нурмагомедов Макгрегоры кытта харчы эрэ инниттэн киирсиэн сөп

WBA ыарахан ыйааһыҥҥа экс-чөмпүйүөнэ, РФ Госдуматын дьокутаата Николай Валуев UFC (Ultimate Fighting Championship) турнирын кыайыылааҕа Хабиб Нурмагомедов Конор Макгрегоры кытта хаттаан харчы эрэ инниттэн киирсиэн сөп диэтэ. Ити туһунан Новости РИА иһитиннэрэр.

Спорду сэҥээрээччилэр билэллэрин курдук, 2018 сыл алтынньы 6 күнүгэр ыытыллыбыт UFC 229 турнирыгар Хабиб Нурмагомедов Конор Макгрегоры кыайан турар. Онно спортсменнар күөн көрсүү кэнниттэн буолбут охсуһууга хамаандаларын бэрэстэбиитэллэрин кытта кыттыбыттара. Хабиб Нурмагомедов охсуһууну саҕалаабытын иһин күрэхтэһэр бырааба тоҕус ыйга быһылынна итиэннэ мөлүйүөн аҥаара дуолларга ыстарааптанна. Оттон Конор Макгрегор 50 тыһыынча дуоллардаах ыстараапка уурулунна уонна алта ыйга күрэхтэһииттэн туоратылынна. Маннык быһаарыыны соторутааҕыта Невада штат Атлетическай хамыыһыйата ылыммыта.

Николай Валуев Арассыыйа байыаһа Нурмагомедов ирландец Макгрегоры кытта хаттаан харчы эрэ инниттэн киирсиэн сөп диэтэ, уонна бу шоу-бизнес, манна барытын харчы эрэ быһаарар диэн бэлиэтээн эттэ. Уонна хас биирдии киирсиилэрин иһин үтүмэн үбү киллэринэр боксердары — Мэнни Пакьяоны уонна Флойд Мэйуэзеры — холобур аҕалла.

Санатан эттэххэ, Хабиб Конор Макгрегоры кытта киирсиитин иһин мэктиэлэммит гонорарын суумата икки мөлүйүөн дуолларга тэҥнэһэрэ.

Роман ПОПОВ, «Саха сирэ» хаһыат, edersaas.ru

Хаартыска: интэриниэттэн ылылынна