Валерия Винокурова: «Аныгы үйэҕэ дьахтар, эр киһи дьарыга диэн арахсыбат»

Валерия Винокурова — аныгы олоҕу кытары тэҥҥэ хаамар, дьиэ кэргэнин уонна дьоҕус биисинэһи тэҥҥэ тутан дьарыктанар. Кэргэнинээн Ньургун Пахомовтыын дьиэ-уот туттан, бэйэ дьарыгын сайыннаран иккис сылын эстетика салонун үлэлэтэллэр.

Икки уол иһирэх ийэтэ оҕолорунан дьарыктанар, минньигэс астары астыыр, ону таһынан төрөөбүт дойдутун эмиэ умнубат.

«Like me» эстетика студията

—Кэргэним илбииһит, сүрүн үлэлээх. Үлэбит таһынан эбии харчы киллэриммит киһи диэн хас да сыл баҕа санаа оҥосторбут. 2016 сыллаахха үлэбиттэн уурайан баран үлэлээх буолуу киинигэр бырайыак суруйан көмүскээбитим. Ол түмүгэр, илбийии хоһун арыммытым. Кэргэним сүрүн үлэтин кэнниттэн эрэ үлэлиирэ — мин килийиэн булуутунан, рекламанан дьарыктанарым.
Бэйэм эмиэ туох эрэ дьарыктаах буолуохтаахпын диэн санааттан 2018 с шугаринг куурсугар үөрэммитим. Ол кэннэ «Like me» диэн эстетика студиятын арыйбытым. Кэрэ буолуу — кырасыабай эрэ буолуу буолбатах, кырасыабай буолуу сүрүн төрүөтэ — доруобай буолуу. Онон эстетика студиям биир бочуоттаах миэстэтигэр кэргэним, биллэр илбииһит — Ньургун Пахомов үлэлиир. Студиябытыгар массаж, шугаринг, косметология, кыламан үүннэрии, тыҥырах оҥоруу өҥөлөрүн оҥоробут. Бэйэбин уонна кэргэммин аахпакка аҕыс маастарга үлэ миэстэтин таһааран, куортамҥа биэрэбин. Бары сэртипикээттээх, уопуттаах маастардар.

Шугаринг — «саахар» диэн англия тылыттан үөскээбит, саахар паастатынан эккэ-сииҥҥэ үүнэр түүлэри суох гынар ньыманы ааттыыллар. Билигин шугаринг диэн тыл күннээҕи олоххо элбэхтэ туттуллар, ордук кэрэ аҥаардарга наадалаах буолла. Биирдэ сырыттахтарына, бу өҥөнү олус сөбүлүүллэр. Шугаринг туһунан толору сүбэлэри Валерия Винокурова Like_me диэн Инстаграм страницатыттан булан ааҕыаххытын сөп.

Кустуубун, куобахтыыбын

Ньургунум куска бараары долгуйа-долгуйа оҥосторун урут олох өйдөөбөт этим. «Наһаа да итинник буолбатар» диэн өссө сэмэлиирим. Оттон биирдэ куска барыстым уонна дууһалыын сынньанан, бултка сылдьар хайдах курдук үчүгэйин билэн баран, аны, дьаныһан туран былырыын саа ылыммытым.

Онтон ыла кус сезонун биирдэ даҕаны көтүтэ иликпин, кэргэмминээҕэр бэйэм ордук күүтэбин. Саас, күһүн куорат таһыгар, арыыларга, дойдубар Мэҥэҕэ тахсан кустуубут. Хас да куһу өлөрөн турабын. Онон булка «азарт» диэн баарын сүрэхпинэн биллим. Кустуурум таһынан куобахха эмиэ сылдьыбытым. Биир да куобаҕы бултуу иликпин эрээри, интэриэһинэй.
Булт кэмигэр айылҕаны кытары алтыһыы туохха да тэҥнэммэтин сүрэхпинэн биллим. Тус бэйэм үлүһүйдэхпинэ дьаныһан туран дьарыктанар идэлээхпин, ол да иһин булду сэҥээрбитим буолуо.

От охсуутугар үс төгүл бастаабытым

Дьиэ хаһаайката буоларым быһыытынан ас астыырбын сөбүлүүбүн. Оҕуруотунан үлүһүйүөхпүн, Мархаҕа сайыҥҥы уу ситимэ суох буолан, кыһалҕалаах соҕус. Онон тэлгэһэбэр сибэкки үүннэрэбин. Оҕолорбутун, төһө кыалларынан, бэйэбит тугу сатыырбытыгар үөрэтэбит. Айылҕаҕа илдьэ сылдьабыт. Батыһыннара сылдьан бултуурга, балыктыырга кыралаан үөрэтэбит. Ону тэҥэ сир астыырга сырытыннарабыт.
Урут хотуурунан от охсуутугар дойдубар, Мэҥэ Хаҥаласка, үс төгүл бастаан турабын. Аныгы үйэҕэ дьахтар, эр киһи дьарыга диэн арахсыбат дии саныыбын.

Дойдум дьонун түмэн

Хас биирдии киһи төрөөбүт дойдулаах, силистээх-мутуктаах. Мин Мэҥэ Хаҥалас улууһун Өлөчөй нэһилиэгэр күн сирин көрбүтүм, оҕо сааһым, оскуолатааҕы умнуллубат кэмнэрим төрөөбүт дойдубар ааспыттара. Сир хайа да муннугар тиийдэрбин төрөөбүт дойдум туохтааҕар да күндү буолар. Төрдүс сылын төрөөбүт нэһилиэкпиттэн төрүттээх дьон түмсүүтүн салайан үлэлэтэбин. Инстаграм ситим нөҥүө биир дойдулаахтарбын түмэн, нэһилиэкпит олоҕо тупсарыгар ыҥыран туран уопсайа 184 тыһ. солк харчыны хомуйдубут. Олохтоох көҕүлээһини өйөөһүн бырагырааматыгар киирсэн (ППМИ) конкуруһу ааһан, субсидия көрүллүбүтэ. Ол түмүгэр Өлөчөй иһинэн уу ситимэ тардылынна, ону тэҥэ оҕо былаһаакката үлэҕэ киирдэ.

Барытыгар ситиһиилээх саха аныгы дьахтарын биир үтүө холобура буолар Валерия Винокурова бириэмэтин аттарар кистэлэҥин «Бэйэм бэйэбин бас билэр буоламмын, элбэҕи ситиһэбин» диэн быһаарар. Санаан көрдөххө, дьаһаллаах, бэйэтигэр ирдэбиллээх киһи бириэмэтин сөпкө туһанар. Валерияҕа саҥаттан саҥа санаалары, ситиһиилэри баҕарабын!

Надежда Ильина