Валерий Жондоров: «Эһиил дотация кээмэйин 3 миллиардка диэри эбэллэрин ситистибит»
СӨ Бырабыыталыстыбатын 2018 сылга бүтэһик мунньаҕар өрөспүүбүлүкэ судаарыстыбаннай бүддьүөтүн кэлэр сылга уонна былаан быһыытынан, 2020-2021 сылларга сокуон туолуутун көрдүлэр.
edersaas.ru
Ахсынньы 19 күнүгэр Ил Түмэҥҥэ бүддьүөт туһунан ылыныллыбыт сокуон чэрчитинэн, 2019 сылга өрөспүүбүлүкэ бүддьүөтүгэр киирэр дохуот кээмэйэ – 201,1 миллиард солкуобай, ороскуот 202,2 миллиард солкуобай, дэписиит 1,1 миллиард солкуобай. Ону таһынан, 74 772,8 миллиард солкуобай үп эбии киириэхтээх. Бүддьүөтү хааччыйар дотация 46 907,2 миллиард солкуобайга тэҥнэстэ.
«Дотация кээмэйин көрөргө хотугу эрэгийиэннэр тымныы тыйыс усулуобуйаҕа олороллорун учуоттуурга РФ Үпкэ, Уһук Илини сайыннарыы министиэристибэтигэр этии киллэрбиппит. Саха сиригэр улуустар икки ардыларыгар суол-иис ырааҕын, тырааныспар төгүрүк сыл сатаан тиийбэтин ааҕан туран, модельнай бүддьүөккэ хамнаһы төлөөһүн эмиэ уларыйыахтааҕын туруорсубуппут. Бу этиилэрбитин РФ Үпкэ министиэристибэтэ ылынан, эһиил модельнай ороскуоппут 85 бырыһыаҥҥа диэри эбиллэн, дотация кээмэйин 3 миллиардка диэри улаатыннарары ситистибит.
Ону таһынан, суолу-ииһи оҥоруу, өрөмүөннээһин, тулаайах оҕолору дьиэннэн хааччыйыы, хаарбах дьиэттэн дьону көһөрүү ороскуоттарын, итиэннэ «21 үйэҕэ – мин өрөспүүбүлүкэм» Үтүө санаа дьыалатын үбүлээһинин киин сиргэ түмэр санаалаахпыт. Оччотугар үп-харчы туохха туттуллара ырылхайдык көстө сылдьыа”, — диэтэ СӨ үбүн миниистирэ Валерий Жондоров.
Марианна Тыртыкова, «Саха сирэ», edersaas.ru