Валерий Лимаренко: “Азия оҕолоругар” бэлэмнэнии былаан быһыытынан барар”
Аҕыйах хонуктааҕыта Москваҕа “Азия оҕолоро” норуоттар икки ардыларынааҕы кыһыҥҥы спортивнай оонньуулары тэрийэн ыытар кэмитиэт мунньаҕа буолла. Онно Уһук Илин уокурукка РФ Бэрэсидьиэнин боломуочуйалаах бэрэстэбиитэлэ, РФ Бырабыыталыстыбатын бэрэссэдээтэлин солбуйааччы Юрий Трутнев кыттыыны ылла.
Сахалин уобалаһын баһылыга Валерий Лимаренко Оонньууларга бэлэмнэнии былаан быһыытынан баран иһэрин, сүрүн болҕомто күрэхтэһии ыытыллыахтаах эбийиэктэригэр уурулларын эттэ.
Спорт федерацияларын бэрэстэбиитэллэрэ күрэхтэһии ыытыллыахтаах сирдэрин бэлэмнэрин, хааччыллыыларын үрдүктүк сыаналаатылар. Эдэр спортсменнар «Восток» үөрэнэр-эрчиллэр кииҥҥэ, «Юность» гостиницаҕа, «Синегорские минеральные воды» санаторийга итиэннэ медколледж уопсайыгар олоруохтара.
Тэрийээччилэр Оонньуулар ыытыллар сирдэригэр куттал суох буолуутун хааччыйыы харах далыгар тутулларын, кэтээн көрөр тиэхиньикэнэн толору хааччыллыбыттарын, бэрээдэги көрүүгэ төһө киһи үлэлиэҕэ чопчуламмытын иһитиннэрдилэр.
Күн бүгүн сүүрбэ судаарыстыбаттан 28 хамаанда кыттара биллэр, саамай элбэх кыттааччылаах көрүҥнэринэн хоккей, хайыһарынан сүүрүү, шорт-трек уонна сноуборд буолаллар.
—Оонньуулар саҕаланаллара отут хонук хаалла. Сахалин уобалаһа федеральнай уонна олохтоох былаас уорганнарын кытта бииргэ маннык далааһыннаах тэрээһини үрдүк таһымнаахтык сатаан тэрийэн ыытарын дакаастыах кэриҥнээх. Бу кэнэҕэһин уобалас аатын үрдэтиигэ, туристар интэриэстэрин тардыыга үлэлиэҕэр саарбахтаммат. Саамай сүрүнэ – тутуллубут спорт эбийиэктэрэ, саҥардыллыбыт транспорт, доруобуйа харыстабылын оборудованиелара уһун сылларга олохтоохторго сулууспалыаҕа, — диэтэ Валерий Лимаренко.
Санатан эттэххэ, “Азия оҕолоро” норуоттар икки ардыларынааҕы кыһыҥҥы спортивнай оонньуулар Соҕуруу Сахалинскайга олунньу 8—17 күннэригэр ыытыллыахтара. Онно сүүрбэ судаарыстыбаттан 1 300 спортсмен кыттара күүтүллэр. Спорт аҕыс көрүҥэр – хайыһарынан сүүрүүгэ, биатлоҥҥа, шорт-треккэ, фигурнай хаҥкылааһыҥҥа, хоккейга, хайыһарынан хайаттан түһүүгэ, сноубордка, трамплинтан ыстаныыга барыта 90 мэтээл комплега оонньонуоҕа.
Роман Попов
Хаартыска Интэриниэттэн ылылынна