Валерий Гергиев Эпос киинин акустическай саалатын оҥорууга көмөлөһүөҕэ
РФ народнай артыыһа Валерий Гергиев бэлиэтээбитинэн, Саха сиригэр култуураҕа уонна духуобунаска ураты болҕомто ууруллар.
Саха АССР төрүттэнниитин 100 сыллаах үбүлүөйэ – сайдыы инники саҕаҕын түстүүрүн туһунан этэн туран, маэстро кэскиллээх этиини киллэрдэ:
— Арктикатааҕы эпос уонна искусство киинин мин бөдөҥ национальнай култуура киинин быһыытынан ылынабын. Ол иһин даҕаны киин акустическай саалатын Арассыыйаҕа биир бастыҥынан оҥорорго көмөлөһөргө бэлэммин. Билигин Азияҕа — Японияҕа, Кореяҕа, Кытайга баараҕай култуурунай кииннэр тутулла тураллар. Оттон Арассыыйаҕа Владивостокка уонна Кемеровоҕа эмиэ улахан акустическай саалалар тутуллаллар. Өссө биир оннук саала Дьокуускайга Арктикатааҕы эпос уонна искусство киинигэр баар буолуоҕа. Мин онуоха сөптөөх үлэни тэрийэргэ көмөлөһүөм, эһигини өйүөҕүм. Инникитин салгыы бииргэ үлэлиэхпит.
Мариинскай тыйаатыр музыканнара уонна артыыстара Саха сиригэр хаста да кэлэн кэнсиэртээтилэр. 2007 сылтан тыйаатыр Саха сирин филармониятын кытта бииргэ үлэлиир.
Елена ПОТОЦКАЯ, “Саха сирэ” хаһыат, edersaas.ru