Валерий Гергиев Дьокуускайга Эпос уонна ускуустуба Арктикатааҕы киинин тэрийиини өйөөтө
САССР төрүттэммитэ 100 сылын чэрчитинэн Валерий Гергиев салайааччылаах Мариинскай тыйаатырын симфоническай оркестра Дьокуускайга кэнсиэр оҥордо.
Арассыыйа кырдьаҕас оркестрдарыттан биирдэстэрин кэнсиэрэ сэтинньи 18 күнүгэр Опера уонна балет тыйаатырын сыанатыгар буолла. Бу иннинэ Валерий Гергиев кэлэктиибин уонна пианист Александр Торадзены кытта Томскайга, Кемеровоҕа кэнсиэрдээбиттэрэ.
Маэстро Валерий Гергиев бэлиэтииринэн, Саха сиригэр култуура уонна духуобунас сайдыытыгар ураты болҕомто ууруллар. Онон сүүс сыллаах үбүлүөй – өрөспүүбүлүкэ сайдыытын кэрэһитэ уонна инники сайдыы торума.
“Мантан чугастыы дьэндэйэн эрэр бырайыагы кытта бастакы билсиим үөрүүбэр төрүөт буолла, — бу бөдөҥ култуура национальнай киинэ (Эпос уонна ускуустуба Арктикатааҕы киинэ – эрэд.) Бу бырайыак киэҥ далааһыннааҕын көрөбүн! Онон акустическай сааланы Арассыыйаҕа эрэ буолбакка саамай бастыҥ оҥорорго көмөлөһүөхпүн баҕарабын. Билигин үчүгэй саалалар Азияҕа баар буоллулар, Кытайга, Японияҕа, Кэриэйэҕэ тутуу тэтимнээхтик ыытыллар. Биһиги Владивостокка, Кемеровоҕа тутабыт, өссө биир комплекс манна Дьокуускайга баар буолуоҕа. Саалаҕа акустиканы сөптөөхтүк быһаарарга көмөлөһүөм. Итиннигэ суох бэйэтин суолтатын уонна сыанаһын сүтэриэҕэ, онон 10 төгүл кыра буолуо суохтаах. Бу өттүгэр бииргэ үлэлэһиэхпит”, — диэтэ Валерий Гергиев.
Саха сирин баһылыга Айсен Николаев САССР 100 сылын көрсө үбүлүөйдээх тэрээһиннэри Мариинскай тыйаатыра арыйара улахан чиэс буоларын бэлиэтээтэ.
Оркестр бастакы скрипкаларын бөлөҕөр В.А.Босиков аатынан Саха Өрөспүүбүлүкэтин Муусука Үрдүкү оскуолатын бүтэрбит Екатерина Скурту баар, кини 2018 сыллаахха бэрэпиэссэр Лариса Габышева кылааһын бүтэрэн, бу тыйаатырга үлэҕэ ылыллыбыта.
Мариинскай тыйаатыр муусукааннара уонна артыыстара Саха сиригэр хаста даҕаны кэнсиэр биэрбиттэрэ. 2007 сылтан тыйаатыр Саха сирин филармониятын кытта үлэлэһэр. Филармония камернай кэлэктииптэрэ, ону тэҥэ Symphonica ARTica судаарыстыбаннай струннай оркөстр сыл аайы кэриэтэ Мариинскай тыйаатыр сценатыгар кытталлар. САССР 100 сылын чэрчитинэн Symphonica ARTica Санкт-Петербурга 2022 сыллаахха кэнсиэрэ былааннанар.
Хаартыска: СИА.