Валерий Андросов от ыйын 2-5 күннэригэр Хорватия Загреб куоратыгар көҥүл тустууга юниордарга аан дойдуга бастыыр иһин күрэхтэһиигэ Арассыыйа сүүмэрдэммит хамаандатын аатыттан киирсэн, бочуоттаах боруонса мэтээл хаһаайына буолан кэлбитэ.
edersaas.ru
Усуйаанаттан төрүттээх, көҥүл тустууга юниордарга аан дойдуга боруонса мэтээл хаһаайынын Валерий Андросовы уонна кини тириэньэрин Иван Сивцевы Р.М. Дмитриев аатынан олимпийскай эрэллэри бэлэмниир училищеҕа чиэстээтилэр.
Үөрүүлээх тэрээһиҥҥэ Р.М. Дмитриев аатынан олимпийскай эрэллэри бэлэмниир училище дириэктэрин солбуйааччы Александр Контоев, СӨ спордун миниистирин бастакы солбуйааччы Семен Чердонов, Тутуу ырыынагын генеральнай дириэктэрэ, тустуу федерациятын салалтатын чилиэнэ Афанасий Заболоцкай, тренердэр, спортсменнар уонна тустууну сэҥээрээччилэр сырыттылар.
“Валерий киирсиилэрин барытын көрбүтүм. Олус үчүгэй, киһи биһириир киирсиилэрин көрдөрдө. Бу кыайыытынан муҥурдаммакка өссө да элбэх кыайыылары аҕаллын”, — диэн Семен Чердонов санаатын үллэһиннэ. СӨ Спордун министиэристибэтин аатыттан Валерийга уонна кини тириэньэригэр Иван Сивцевкэ махтал сурук уонна өйдөбүнньүк бэлэхтэри туттардылар. Маны таһынан, тэрээһиҥҥэ ыҥырыллыбыт урбаанньыттар эдэр бөҕөскө үбүнэн көмөлөстүлэр. Олимпийскай эрэллэри бэлэмниир училище аатыттан харчынан сэртипикээти Александр Контоев туттарда.
Саҥа ситэн эрэр эдэр бөҕөспүтүгэр өссө да элбэх ситиһиини баҕарыаҕыҥ. Өссө күүскэ эрчиллэн, үрдүк чыпчааллары дабайдын!
Иван Сивцев, тириэньэр:
— Маннык сылаастык биһигини көрсүбүттэриттэн үөрдүбүт. Валера олус үчүгэйдик кииристэ. Бу иннинэ киниэхэ улаханнык ким да эрэммэт этэ. Улахан кыайыытынан Уһук Илиҥҥэ чөмпүйүөннээбитэ буолара. Ол кэнниттэн, уолаттарга Арассыыйаҕа бастыыр иһин кыайан, аан дойдуга киирсэр чиэскэ тиксибитэ. Былырыыҥҥыттан ыла кини мин салалтабынан дьарыктанар. Биһигини өссө да элбэх үлэ күүтэр.
Николай Попов, «Саха сирэ» хаһыат, edersaas.ru