Уус Алдан улууһуттан Мүрү нэһилиэгин дьокутаата Валентина Шадрина:
—Күн ахсын дойдубутугар буола турар быһыыны, Украина Арассыыйа икки ардыларыгар сыһыаны дьон кэтээн көрөр. Маныаха билиҥҥи кэмҥэ дьон санаатын буккуйар араас иһитиннэриилэр элбэхтэр. Ол эрээри, биирдиибит бигэ эрэллээх буоларбыт наада. Арассыыйа киэҥ уораҕайыгар олорор норуот бары биир санаанан дойдубут салалтата ыытар бэлиитикэтин өйүөхтээхпит дии саныыбын. Хайа да кэмнээҕэр билигин бииргэ түмсэрбит наада. Дойдубут Бэрэсидьиэнин В.В.Путины тула сомоҕолоһон, Арассыыйабыт сарсыҥҥы күнүгэр эрэнэбит. Саха сирин дьахталларын сойуустара ыытар аһымал аахсыйаларын толору, биһиги «Алаас Хотун», «Дьол уйата» элбэх оҕолоох ийэлэр түмсүүлэрэ өйүүбүт. Тулуурдаах буолуоҕуҥ — олоххо, эрэниэҕиҥ дойдубут салалтатыгар. Бу билигин буола турар айдаан намырыаҕа, Арассыыйа улахан кыахтаах дойду буоларын дакаастыаҕа.