Валентина Прокопьева: «Устуоруйаҕа киирэр тэрээһиҥҥэ кыттыым — дьолум!»

Ааптар: 
Бөлөххө киир:

«Триумф» спортивнай комплекса Саха АССР төрүттэммитэ 100 сылын бэлиэтиир улухан бырааһынньыкка өрөспүүбүлүкэтээҕи култуура бары салааларын айар кэлэктииптэрэ кыттыылаах олус дириҥ ис хоһоонноох тэрээһин буолан ааста.

«И они продолжили творенье мира» («Эллэй эһэбит саҕаттан…») тэрээһиҥҥэ 1700 киһи кыттыыны ылла.  Кинилэр ортолоругар Өймөкөөн улууһуттан бу далааһыннаах тэрээһиҥҥэ оройуоннааҕы аҕыйах ахсааннаах норуоттар ассоциацияларын чилиэнэ, актыыбынай уопсастыбанньык Валентина Прокопьева кытынна.

Валентина Николаевна кыттааччы быһыытынан санаатын бу курдук үллэстэр:

— Биһиги араас улуустартан Өксөкүлээх Өлөксөй аатынан Норуоттар доҕордоһууларын дьиэтигэр араас култуурунай түмсүүлэргэ, айар бөлөхтөргө сылдьар дьон бу олус улахан суолталаах тэрээһиҥҥэ кыттыыны ыллыбыт.  Тамара Попова салайар «Дьүкээбил» ансаамбылыгар сылдьабын. Манна араас улуустар иллээхтик  дьарыктанабыт. Быйыл бу айар бөлөх тэриллибитэ 15 сылын бэлиэтиир.

Мин, ыраах Тымныы полюһун Өймөкөөн улууһун Томтор нэһилиэгин олохтооҕо, аатырбыт режиссер Андрей Борисов салайар театрализованнай көстүүтүгэр кыттыам диэн хаһан санаабытым баарай? Онон мин устуоруйаҕа киирэр тэрээһиҥҥэ кыттыым — дьолум!

 Биллиилээх артыыстары кытта биир долгуҥҥа оҕустаран, киинэҕэ уһуллар курдук үс күнү быһа тохтоло суох бэлэмнэннибит. Өрөспүүбүлүкэҕэ аатырбыт үҥкүү ансаамбыллара, аааттаах-суоллаах айар бөлөхтөр Андрей Саввичпыт туох дииринэн бэлэмнэннибит. Олох ураты тыын буолар эбит, өрөспүүбүлүкэ төрүттэниитин илэ бэйэҕинэн кыттан көрдөрүүҥ. Онон олоҕум бу саамай бэлиэ түгэнэ – Саха АССР 100 сыллаах үбүлүөйэ хаһан да өйбүттэн-санаабыттан сүтүө суоҕа! 

Кырдьык, норуоттар сомоҕолоһууларын ойуулаан көрдөрүү — саамай долгутуулаах уонна истиҥ түгэн буолара чахчы.

Елена ПОТОЦКАЯ, «Саха сирэ».

Хаартыска Валентина Прокопьева тиксэриитэ.

+1
0
+1
0
+1
0
+1
0
+1
0
+1
0
+1
0