![](https://edersaas.ru/wp-content/uploads/2021/01/14d664076f1fb1cd35ac59ca822e9884e4bb4706.jpg)
Ил Дархан кэлиҥи кэмҥэ өрөспүүбүлүкэҕэ эпидемиологическай балаһыанньа туруктаммытын уонна коронавируһунан ыалдьыы ахсаана намтаан эрэрин эттэ.
Ааспыт сууккаҕа 132 киһи ыалдьыбыт. Мантан 44-дэ Дьокуускай куоракка. Ыарахан туруктаах ыарыһахтар ахсааннара аҕыйаабыт. Билиҥҥи туругунан 45 ыарыһах туруга ыарахан, мантан сэттэтэ ИВЛ аппараатыгар холбоммут.
Айсен Николаев чугастааҕы кэмҥэ коронавирус утары быһыыны туруорууну сүрүн соругунан буоларын эттэ.
Билиҥҥитэ өрөспүүбүлүкэҕэ 27292 доза вакцина кэлбит. Сотору кэминэн өссө 17300 доза аҕалыллыахтаах. Вакцина бастакы баартыйатын 6929 киһи ылбыт. Мантан 545 киһи ааспыт сууккаҕа. 1021 киһи вакцинация икки түһүмэҕин ааспыт.
Билигин быһыыны биэрии 23 улууска уонна Дьокуускай куоракка ыытыллар. Сорох улуустарга күн-дьыл туруга мэһэйдээн, вакцина тиэрдиллэ илик.
Вице-премьер Ольга Балабкина сууккаҕа 3000 доза быһыыны туруоруу былааннанарын туһунан иһитиннэрдэ. Билиҥҥитэ бу үлэҕэ 450 мэдиссиинискэй үлэһит сылдьар.
Сүбэ мунньахха ХИФУ устудьуоннарын вакцинациялааһын боппуруоһа көрүлүннэ. Устудьуоннар быһыыны икки түһүмэҕин ылбыттарын кэннэ, күнүскү үөрэххэ (очная форма) көһүөхтээхтэр. Билиҥҥитэ 5-6 тыһыынча доза наада.
Доруобуйа харыстабылын миниистирэ Елена Борисова РФ Доруобуйа харыстабылын министиэристибэтэ икки нэдиэлэ буола-буола эрэгийиэннэргэ 10-15 тыһыынча дозаны ыытыахтааҕын эттэ.
Билигин Саха сирин олохтоохторо «Госуслуги» портал нөҥүө вакцина ылаары суруттаран эрэллэр. Испииһэккэ номнуо 8000 киһи суруттарбыт.
СӨ Ил Дарханын уонна Бырабыыталыстыбатын пресс-сулууспата