Сүрүн Уопсастыба

Вакцинаны харайар усулуобуйа баар

Саха сиригэр кэлбит вакцинаны харайар усулуобуйа баар дуо?

Бүгүн, ахсынньы 10 күнүгэр, өрөспүүбүлүкэ коронавируһу бохсууга суһал штабын салайааччытын солбуйааччы Ольга Балабкина уочараттаах бирифинэ буолла. Бастатан туран, Ольга Валерьевна өрөспүүбүлүкэҕэ ковиды утары 300 доза вакцина аҕалыллыбытын эттэ. Маркировкатын бүтэрэн баран, быраастарга вакцинаны туруоруу саҕаланыаҕа. Арассыыйаттан өссө итинник партиялар кэллэхтэринэ, уочарат быһыытынан быраастар, социальнай үлэһиттэр, учууталлар, 65 үөһээ саастаахтар ылыахтара. Уопсайынан ыллахха, О.Балабкина этэринэн, өрөспүүбүлүкэ вакцинацияны ыытыыга бэлэм.  Харайар анал холодильниктар бааллар. Оройуоннарга вакцинаны ыытыыга көһөрүллэ сылдьар холодильниктар туһаныллыахтарын эттэ.

Оттон ковид дьаҥын туһунан этэригэр кини билигин даҕаны санитарнай-эпидемиологическай турук ыгымын бэлиэтээтэ. Ол курдук, бүгүҥҥү чахынан 205 киһи бу дьаҥҥа хаптарбыт. Итинтэн Дьокуускайга – 95 киһи. Уонтан тахса киһи ыалдьыбыта Нерюнгрига, Алдаҥҥа бэлиэтэнэр. Мэҥэ Хаҥалас, Мииринэй курдук 7 түгэн бэлиэтэнэн, Амма улууһугар ыарыы эмиэ тэнийэр кутталламмыт. Ону сэргэ Томпо улууһун олохтоохторун уонна былааһын болҕомтотугар туһаайан бу оройуоҥҥа дьаҥы утары үлэни күүһүрдүү соруга  туруохтааҕын санатта.

15 лаборатория үлэлиир. 3644 чинчийии ПЦР ньыматынан бу ааспыт сууккаҕа оҥоһуллубут.

Ольга Валерьевна Саха сирин олохтоохторугар кирииби  утары прививкэ оҥоһуллан, түмүктэнэн эрэринэн, ыла иликтэргэ тиэтэйэллэригэр сүбэлээтэ.

Ахсынньы 10 күнүнээҕи балаһыанньа итинник.

Чэгиэн буолуҥ, мааската кэтиҥ!

Бэлэмнээтэ Женни Стрюкова, edersaas.ru

Хаартыска:СИА-тан.

0
0
Telegram @edersaas20

Добавить комментарий