Ыраах Эбээн Бытантайга дьаҥтан быһыыны ылыыны хайдах тэрийэллэрий? Манна ааҕыҥ.
Эбээн Бытантай улууһа өрөспүүбүлүкэҕэ коронавирус дьаҥыттан быһыыны ылыыга инники күөҥҥэ иһэр. Ол туһунан улуус баһылыга Гаврил Гаврилович Горохов санаатын маннык үллэһиннэ:
— Коронавируһу утары быһыыны улууспут олохтоохторо көхтөөхтүк ылаллар. Кэлбит вакцинаны Дьарҕаалаахха — 70,62 %, Кустуурга — 42,94 % , Саккырыырга – 41,52 % ыллылар. Ити аата уопсайа 710 доза буолар. Сайыҥҥы кэмҥэ суола-ииһэ суох ыраах сытар Кустуур, Дьарҕаалаах нэһилиэктэригэр бөртөлүөтүнэн бастакы уочарат ыыта сатыыбыт. Өрөспүүбүлүкэбит баһылыга Айсен Николаев эбээн бытантайдар быһыыны ылыыга үчүгэй көрдөрүүлээхтэр диэн бэлиэтээбитэ. Биһигини сэргэ эмиэ хотугу улуустары — Эдьигээн, Муома, Аллайыаха улуустарын ааттаата.
Билигин улууска 6 киһи инфекционнай балыыһаҕа эмтэнэр, 10 киһи – тастан. Сүрүннээн быһыыны ылбатах дьон бу дьаҥҥа хаптардылар. Онон улууспут олохтоохторо коронавирустан быһыыны ылыы наадалааҕын өйдөөтүлэр. Уонна Ил Дархан дьаҥы утары Ыйааҕыгар олоҕуран, самоизоляцияны күүскэ тутуһа сатыыбыт.
Бэлэмнээтэ Женни Стрюкова
Хаартыска: баһылык Г.Г.Горохов