Вакцина ылбатахтар ыараханнык ыарыйдылар

Бөлөххө киир:

Суһал ыстаап салайааччытын солбуйааччы Ольга Балабкина коронавирус дьаҥын балаһыанньата өрөспүүбүлүкэҕэ хайдаҕын билиһиннэрдэ.

Бүгүҥҥү күҥҥэ уустук балаһыанньалаах улуустарга хааччахтыыр миэрэлэри күүһүртүлэр. Ону таһынан, ыарахан туруктаах 138 киһи бэлиэтэнэрин иһитиннэрдэ. Бэлиэтээн эттэххэ, бу ыараханнык ыалдьыбыт дьон ахсааныгар үксэ вакцина ылбатах дьон киирэллэрэ билиннэ. Ольга Валерьевна коронавирус дьаҥын эрэ утары буолбакка, кириип утары быһыыны ыларга ыҥырда. Ыараханнык ыалдьыбыт дьонтон 39 киһи ИВЛ аппараат нөҥүө тыына сытар, бэлиэтээн эттэххэ, улуус бары мэдиссиинэтин тэрилтэлэрэ ИВЛ аппараатынан хааччыллыбыттар. Аҕам саастаах дьон ахсаана балыыһа куойкаларыгар элбээбит, олор үгүстэрэ вакцина ылбатах дьон буоллулар. Билигин өрөспүүбүүкэ үрдүнэн вакцина туруоруутун үлэтэ салҕанар. Вакцина бастакы компоненын 432 288 киһи номнуо ылбыт, ол эбэтэр нэһилиэнньэ 63% диэн ааҕыллар. Оттон 60 сааһын ааспыт аҕам саастаах дьон – 83 587 киһи. Ол эбэтэр аҕам саастаахтар 59% вакцина ылбыттар. Бэлиэтээн эттэххэ, Ил Дархан Айсен Николаев ревакцинацияны сүрүн сорукка туруорда. Бүгүҥҥү күҥҥэ 41 149 киһи ревакцинацияны ааспыт. Доруобуйа харыстабылын министиэристибэтэ уонна эпидемиологтар бэлиэтииллэринэн, алта ый анараа өттүгэр вакцина ылбыт дьон ревакцинацияны булгуччу ааһыахтаахтар. Маны сэргэ, эрэгийиэҥҥэ кирииби утары быһыы хампаанньата ыытылла турар. Былаан быһыытынан 43% өрөспүүбүлүкэ олохтооҕо бу быһыыны ылбыт. Оттон оҕолор 52%, ол эбэтэр 113 тыһыынча оҕо кирииби утары быһыы ылбыт. Маны таһынан, сэтинньи 8 күнүттэн Саха сиригэр уопсастыбаннай сирдэргэ сылдьыы хааччахтааһына үлэлиир. Коронавирус дьаҥар ыалдьан баран үтүөрбүт уонна вакцина ылбыт QR куодтаах уонна доруобуйатын туругунан вакцина ылар кыаҕа суох, ону туоһулуур ыспыраапкалаах, ПЦР анаалыһын болдьоҕо ааһа илик дьон сылдьаллара көҥүллэнэр.

Ульяна ЗАХАРОВА, edersaas.ru

+1
0
+1
0
+1
0
+1
0
+1
0
+1
0
+1
0