Олунньу 4-5 күннэригэр Покровскайга Спорт дыбарыаһыгар «Хаҥалас хапсаҕайа» өрөспүүбүлүкэ таһымнаах күрэхтэһии уонна ССРС, РСФСР, Саха АССР спордун маастара, Саха АССР култууратын үтүөлээх үлэһитэ Илья Петрович Кондратьев сырдык кэриэһигэр муҥутуур кыайыылааҕы быһаарар турнир бэрт тэрээһиннээхтик ыытылыннылар. https://edersaas.ru
Түһүлгэ муҥутуур кыайыылааҕын иһин 16 бөҕөс илин-кэлин кииристэ. Финалга Үөһээ Бүлүү ааттааҕа, өрөспүүбүлүкэ хапсаҕайга 15 төгүллээх чөмпүйүөнэ Увар Тимофеев уонна Нам улууһуттан спорт маастара Игорь Софронеев кииристилэр. Өр эрийсиилээх киирсии кэнниттэн, бириэмэ бүппүтүнэн сэрэтиинэн Увар Тимофеев кыайыылаах таҕыста. Киниэхэ 100 тыһ. солкуобайдаах телевизор уонна бэдэр тириитэ бэлэх ууннулар.
Увар санаатын үллэстэр:
— Үрдүк тэрээһинээх күрэхтэһии буолла. Тэрийээччилэр, судьуйалар үчүгэйдик үлэлээтилэр, улахан туох даҕаны айдаан, быһаарсыы тахсыбата. Мин ыйааһыммар монголлар кииристилэр. Ыраах дойдуттан анаан-минээн оҥостон кэлбиттэр, ол эрээри мин эмиэ кинилэр дойдуларыгар сылдьыбытым диэммин долгуйбатым. Киирсиэхпин баҕарбыт Айаал Лазаревым, Баир Укоевым кэлбэтэхтэр. Олор бааллара буоллар өссө тыҥааһынаах буолуо этэ. Салгыы Петр Алексеев турнирыгар бэлэмнэнэбин. Илья Кондратьев бирииһигэр муҥутуур аатын иһин киирсэн иккис кыайыым буолар. Онон бу бэдэр тириитин иккис сырыыбын ылабын, урут ылбыппынан бэргэһэ оҥостубутум. Онон бэргэһэбин саҥардар буоллум (күлэр).
Бэй.корр., https://edersaas.ru
УВАР ТИМОФЕЕВ УОННА ИГОРЬ СОФРОНЕЕВ.
МУҤУТУУР КЫАЙЫЫЛААХ ААТЫН ИҺИН КИИРСИИ.