Уустук суоллаах-иистээх нэһилиэктэр аһынан-үөлүнэн хааччыллыыларын бэрэбиэркэлиэхтэрэ
Алексей Колодезников сылдьарга уустук, эрэйдээх суоллаах-иистээх нэһилиэктэр аһынан-үөлүнэн хаачыллыыларын бэрэбиэркэлииргэ соруйда.
СӨ Бырабыыталыстыбатын бэрэссэдээтэлин бастакы солбуйааччы Алексей Колодезников кыһыҥҥы кэмҥэ таһаҕаһы тиэйиини сүрүннүүр биэдэмистибэлэр икки ардыларынааҕы хамыыһыйа мунньаҕын куйаар ситиминэн ыытта. Бу туһунан СӨ Ил Дархан уонна Бырабыыталыстыба пресс-сулууспата иһитиннэрэр.
Мунньахха күн-дьыл туругун туһунан иһитиннэрдилэр, кыһыҥҥы кэмҥэ көлөнөн олоххо-дьаһахха наадалаах таһаҕаһы тиэйиини, массыыналар сылдьалларыгар эрэгийиэннээҕи уонна муниципальнай суолталаах суоллары арыйарга ыытыллар үлэлэр уонна нэһилиэнньэлээх пууннар оттугунан хааччыллыыларын туһунан дьүүллэстилэр.
СӨ нэһилиэнньэҕэ куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Лепчиков кыһыҥҥы кэмҥэ таһаҕаһы тиэрдии былаана 767,4 тыһ. туонна буоларын иһитиннэрдэ. Итинтэн болдьоммут сиригэр бүгүҥҥү күн туругунан, 135,2 тыһ. туонна тиэрдиллибит. Былырыын баччаларга 758,9 тыһ. туоннаттан, 129,9 тыһ.туонна тиэрдиллибитэ бэлиэтэнэр. Кини улуустар истэригэр уонна сылы эргиччи суол баар сиринэн таһаҕас тиэйиитэ салҕанарын этэр. Итини сэргэ таас чоҕу тиэрдии киин уонна өрүс уҥуоргу улуустарга ыытыллар.
СӨ ОДьКХ уонна энергетикаҕа миниистирин бастакы солбуйааччы Вячеслав Емельянов муниципальнай тэриллииллэри кытта бииргэ, улуустарга ОДьКХ эбийиэктэригэр төһө оттук хаалбытын инвентаризациялааһыны, биэдэмистибэлэргэ аакталар толоруллан ыытыллыбыттарын эттэ. Министиэристибэ өттүттэн ыйга иккитэ маннык бэрэбиэркэлээһин оҥоһуллуоҕун туһунан хааччыйар тэрилтэлэргэ уонна муниципалитеттарга рекомендациялар ыытыллыахтара диэтэ.
«Арктика суоллара» тэрилтэ генеральнай дириэктэрэ Владимир Чусовской барыта 17 учаастак суола арыллыбытын бэлиэтээтэ. Билигин «Яна» кыһыҥҥы суолга үлэ ыытылларын, аныгыскы нэдиэлэҕэ «Усть-Куйга — Нижнеянскай» учаастагар үлэ саҕаланыахтааҕын эттэ. Кыһыҥҥы суоллары арыйыыга СӨ массыына суолларын управлениетын салайааччытын бастакы солбуйааччы Виктор Игнатьев кытынна.
Алексей Колодезников СӨ Урбаан министиэристибэтэ, сыана бэлиитикэтигэр судаарыстыбаннай кэмитиэт, тыа хаһаайыстыбатын министиэристибэтэ бииргэ өрөспүүбүлүкэ уустук уонна эрэйддээх суоллаа-иистээх нэһилиэктэригэр аһынан-үөлүнэн хааччыллыыны бэрэбиэркэлииллэригэр сорудахтаата. Ол иһигэр Якутопторг, Туймаада-Агроснаб былааннарын чопчулуурга, урбаанньыттар аһы-үөлү тиэрдиилэрин көрөргө соруйда. Бастакы вице-премьер боппуруоһу ураты хонтуруолга тутарга эттэ. Бары эппиэтинэстээх салайааччыларга кыһыҥҥы суоллар сөптөөх кэмнэригэр аһыллыахтаахтар диэтэ.
СӨ Ил Дархан уонна Бырабыыталыстыба пресс-сулууспата
+1
+1
+1
+1
+1
+1
+1