Бүгүҥҥүттэн “Дархан Уус-2017” Серафим Попов кэриэһигэр Саха сирин тимир уустарын VIII сүрүн быыстапката “Куруһаала” эргиэн эрээттэригэр саҕаланна.
Былырыыҥҥыттан ыла олохтоммут уустар “оскардарын” ылар, сыл Дархан Ууһа аатырар иһин, Тааттаттан, Чурапчыттан, Уус Алдантан, Хаҥаластан, Намтан … түмсүбүт __ “тимири ыллатар” эр бэртэрэ «Дэгиттэр быһах», «Бастыҥ ас быһаҕа», «Бастыҥ дамаск», «Бастыҥ уус-уран оҥоhуулаах быhах» уонна «Чулуу хомус» хайысхаларыгар күрэс былдьаһыахтара.
Быйылгы «Дэгиттэр быһах» хайысха кыайыылааҕа уус статуэткатын сэргэ, Москваҕа сааскы “Клинок” норуоттар икки ардыларынааҕы быһах быыстапкатыгар Саха Өрөспүүбүлүкэтин Тимир уустарын сойууһун чиэһин көмүскүү барарга анал путевканан наҕараадаланыаҕа. Өскөтүн кэнники сылларга «Дэгиттэр быһах» куоталаһыытыгар холоон көрөөччүнэн аатырбыт мадьынылар Михаил Савватеев уонна Виктор Докалов үлэлээбит эбит буоллахтарына, быйылгы тургутугу хапсаҕай Саха сирин аан дарханын аатын хас да төгүллээх хаһаайына Николай Чукров ыытыаҕа. «Бастыҥ ас быһаҕа» күрэхтэһиини, өрүү да буоларын курдук, Олоҥхо дойдутун 1-гы нүөмэрдээх дархан асчыта Иннокентий Тарбахов иилиэ-саҕалыа уонна быыстапка ыалдьыттарын тоҥ балыгынан уонна сылгы тоҥ этинэн күндүлүөҕэ.
Саха сирин тимир уустарын VIII сүрүн быыстапкатын дьүүллүүр сүбэтин тэриллиэҕиттэн ыла П.А. Ойуунускай аатынан судаарыстыбаннай бириэмийэ лауреата, СӨ Духуобунаһын академиятын академига Борис Неустроев-Мандар Уус салайан кэлбитэ. Быйылгыттан бу эппиэтинэстээх дуоһунас, кини үөрэнээччитигэр, саха быһаҕын аар саарга аатырдыбыт, саха быһаҕын муодатын “сокуонун суруйар” Сарыал Билюкиҥҥа сүктэрилиннэ. Дьүүллүүр сүбэ үлэтигэр СӨ Тимир уустарын сойууһун бэрэссэдээтэлин солбуйааччы Роман Готовцев-Мындыр Уус, Мандар Уус илиититтэн суохапчы туппут норуот маастардарыттан биирдэстэрэ Василий Попов-Бааха Уус, СӨ норуодунай артыыһа Герман Васильевич уонна СӨ үтүөлээх артыыската Клавдия Филипповна Хатылаевтар, Россия Худуоһунньуктарын сойууһун чилиэнэ Дьулустаан Бойтунов, СӨ Айылҕа харыстабылын миниистирин солбуйааччы Николай Додохов кытталлар. Археолог Василий Попов уонна “Дархан Уус” хас да төгүллээх кыайыылааҕа Иннокентий Татаринов тутулуга суох эксперт быһыытынан үлэлээн эрэллэр.
Кэлиҥҥи сылларга “Дархан Уус” быыстапка саха төрүт өйдөбүллэригэр дьоҥҥо-сэргэҕэ киэҥник тарҕатыыга үлэлэһэрэ үтүө үгэскэ кубулуйда. Быйыл бу ый 2 күнүгэр Ем. Ярославскай аатынан Саха сирин судаарыстыбаннай холбоһуктаах музейыгар арыллыбыт “Саха ох саата” быыстапка экспонаттара уустар түһүлгэлэрин киэргэттилэр. Санатар буоллахха, тохсунньу 17 күнүгэр буолбут Олоҥхо национальнай кэмитиэтин бэрэссэдээтэлэ Александр Жирков ыыппыт төгүрүк остуолугар саха ох саатын сөргүтүү, үйэтитии, спорт эйгэтигэр киллэрии боппуруоһа көтөҕүллүбүтэ. Сөргүтүү үлэтигэр саха уустара көхтөөхтүк кытталлара күүтүллэр.
Тэрийэр кэмитиэт көрөөччүлэргэ анаабыт дьоһун бэлэҕэ – саха быһаҕын муҥурун булларбат сүдү кыаҕын тургутуу олунньу 19 күнүгэр, өрөбүлгэ, күнүс 12 чаастан буолуоҕа. Бу эрэ түгэҥҥэ саха быһаҕынан тимир халбаһы курдук кырбаан, харандаас курдук уһуктаан көрдөрүөхтэрэ! Ону тэҥэ тимир уустара быһаҕы көрүүгэ-харайыыга, сытыылааһыҥҥа сүбэ-соргу биэриэхтэрэ.
Үгэскэ кубулуйбут “Дархан Уус-2017” Серафим Попов кэриэһигэр Саха сирин тимир уустарын VIII сүрүн быыстапкатын Саха Өрөспүүбүлүкэтин Тимир уустарын сойууһа, “Таатта” Дьокуускай куораттааҕы уопсастыбаннай холбоһук уонна Серафим Валерьевич доҕотторо тэрийэн ыыталлар. Тэрийэр кэмитиэти Тимир уустарын сойууһун толорооччу дириэктэрэ Николай Акимов салайар. Быыстапка үөрүүлээх арыллыытын сиэригэр-туомугар өрөспүүбүлүкэ салайааччылара, айар интеллигенция бэрэстэбиитэллэрэ кыттыахтара.
Гаврил АНДРОСОВ,
“Дархан Уус-2017” Саха сирин тимир уустарын VIII сүрүн быыстапкатын
Пресс-сэкирэтээрэ,
«Саха сирэ» хаһыат, edersaas.ru