Уустар Евгений Григорьевтыын көрүстүлэр

Ааптар: 
Бөлөххө киир:

Кулун тутар 5 күнүгэр А.Е.Кулаковскай аатынан норуоттар доҕордоһууларын дьиэтигэр норуот маастарын күнүнэн “Якутия мастеровая” быыстапка тэриллэн ыытылынна.

edersaas.ru

Бу тэрээһин чэрчитинэн “Саха сирин уустарын” түмсүүтэ куорат салайааччытын эбээһинэһин толоро сылдьар Евгений Григорьевтыын көрсөн бэйэлэрин кыһалҕаларын ырыттылар. 120 киһини биир сойууска хомуйбут түмсүү Саха сирин ааттатар улахан үлэнэн дьарыктанар. Кинилэр оҥорор быһахтара, хомустара өрөспүүбүлүкэ таһыгар биллэллэр, саха аатын ааттаталлар. Улахан маастар быһыытынан биллэр тимир ууһа Роман Ильич Готовцев — Мындыр Уус, түмсүү биир сүрүн баҕатын туһунан кэпсээнтэн тэрээһини саҕалаата. Кини этэринэн уустары түмэр биир киин дьиэ — Уус Кыһата Дьокуускайга тутулуннаҕына, кэлэр кэскиллээх уустары үөрэтэргэ, ытык идэни тарҕатыыга улахан көдьүүстээх буолуо этэ. “Бу Кыһаны холобур Технология уонна дизайн кэллиэһин таһыгар тутуохха сөп” диэн кураанах турар сир баарын туһунан кэпсээтэ. Сир Үөрэҕирии министиэристибэтин балаансатыгар турара биллэр.

Евгений Николаевич бу этиигэ бэйэтин санаатын үллэһиннэ. Уус кыһатын куорат “Залог-2” диэн бырыйыагар киллэрэн, сөргүтүллүбүт былыргы дьиэҕэ тутан, куорат устуоруйатын көрдөрө тутуллуохтаах кыбартаалга киллэрэр туһунан иһитиннэрдэ. “Куоракка кэлэр ыалдьыттарга, туристарга Дьокуускай уруккутун көрдөрөр, сонун, дьикти сири оҥорор былааннаахпыт. Өрөспүүбүлүкэҕэ сынньана кэлэр дьон билигин куораппытыгар хонон эрэ ааһаллар. Биир-икки күн иһигэр куорат иһигэр күүлэйдээн баран Өймөкөөҥҥө, Өлүөнэ очуостарыгар, Киһилээххэ айаныы тураллар. Тоҕо оннугуй? Дьиҥэр, Дьокуускай Уһук Илиҥҥэ биир саамай кырдьаҕас куорат буолар ээ! Хомойуох иһин, турист болҕомтотун тардар биллэр-көстөр эбийиэктэр олус аҕыйахтар. Онон Ярославскай, Крупская, Дежнев аатынан уулуссалар тулалыыр сирдэригэр куорат уруккутун көрдөрөр, былыргы мас тутуулары сөргүтэн, Дьокуускай биир сэргэх сирин туспа оҥорор былааннаахпыт. Уус Кыһата итиннэ дьон болҕомтотун тардар эбийиэк буолуон сөп”, — диэтэ Григорьев.

Бу этиини мустубут дьон ырыттылар: “Төһө табыгастаах сир буолуой? Толкуйдаммыт бырайыактарга барытыгар миэстэ тиийиэ дуо?”—  диэн ыйытыыларга тохтоотулар. Тутуллуохтаах дьиэлэр төһө улахан буолуохтаахтарын, сметаны илдьэ кэлбэтэх буоланнар, өссө биир көрсүһүүнү анаан тэрийиэх буоллулар.

Холбоһук биир көхтөөх кыттааччыта Иннокентий Луковцев этии киллэрдэ: “Туризм сайдыытыгар Үс Хатыҥҥа баар этнокомплексы сайыннары-кыһыннары үлэлэттэххэ улахан көдьүүстээх буолуо этэ. Онно ыһыах эрэ күннэригэр буолбакка, оттуллар дьиэлэри тутан, элбэх киһи сэргиир эбийиэктэрин туттахха, олохтоохтор даҕаны, кэлии да туристар көхтөөхтүк сылдьахтара эбитэ буолуо”, — диэтэ.

Кэпсэтии тахсан, аны, уустар сойуустарын түһүлгэтин туһунан сэһэргэһии таҕыста. 2011 сылга уустарга анаммыт түһүлгэҕэ ураһа туппуттар. Онтукаларын билигин атын тэрилтэни кытта бииргэ туһаналлар эбит. Тутуулара эргэрбит, ону өрөмүөннүөҕү, бастаан дьукаахтарын кытта түһүлгэни үллэстии кыһалҕатын быһаарар ыйытыы үөскээбит. Бу кыһалҕаны Евгений Григорьев бары биир остуол тула мустан сиһилии ырытан быһаарарга ыҥырда. Куорат дьаһалтатыгар ыҥыран көрсүһүннэриэх буолла. Көрсүһүү түмүгэр саҥа ырытыы болдьоҕо ананна, ирдэнэр докумуоннар чопчуланнылар.

Сойуус салайааччыта Роман Ильич Готовцев мунньаҕы астыммытын эттэ:

Олус бэрт, сиһилии ырытыы таҕыста. Устуоруйаҕа киирэр түөлбэҕэ дьиэ тутуллара кэскиллээх. Ол эрэн уус идэтин тарҕатарга, дьону көҕүлүүргэ киэҥ, аныгы дьиэ ирдэнэр, ону өйдүөххэ наада. Онон, тус бэйэм икки туспа дьиэ турдаҕына бэрт буолуо эбит дии санаатым. Аппа уҥуоргутугар дьоҥҥо көрдөрөргө аналлаах үтүө көстүүлээх дьиэ, оттон куорат киинигэр киэҥ оскуола курдук сир.

Саха сирин талааннаах уустарттан биирдэстэрэ Александр Терентьев — Айгын Уус, бэрт тэрээһин ааста диэн сыаналаата:

— Дьиҥ кыһалҕалары куорат салайааччытын кытта кэпсэппипит бэрт буолла. Мин Уус Кыһатын аппа уҥуор тутары сөбүлүү иһиттим. Туристар кэлэллэрэ биһиэхэ эмиэ үчүгэй. Биһиги оҥорон таһаарар табаарбытын кинилэр хамаҕатык ылыахтара этэ.

«Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0