Уус-Тааттаҕа суруйааччылар Анна уонна Николай Неустроевтарга анаан искибиэр арылынна
Тааттаҕа суруйааччылар Анна уонна Николай Неустроевтарга анаан пааматынньык, арт-эбийиэктэр баар буоллулар.
Таатта улууһун Уус-Тааттатыгар саха биллэр суруйааччыларыгар, бииргэ төрөөбүт Николай Денисович уонна Анна Денисовна Неустроевтарга анаммыт искибиэр баар буолла. Манна суруйааччылар пааматынньыктара уонна кинилэр айымньыларынан арт-скульптуралар турдулар.
Пааматынньык ааптарынан худуоһунньук-скульптор Василий Сивцев буолла. Бу үлэ боруонсаттан оҥоһулунна, Иркутскай уобаластан аҕалылынна. Искибиэр арыллыытыгар Василий Сивцевка «СӨ ускуустубатын үтүөлээх диэйэтэлэ» буочуоттаах бэлиэ үөрүүлээх быһыыга-майгыга туттарылынна.
Пааматынньыгы кытта Неустроевтар биллэр айымньыларын уобарастарынан арт-скульптуралар оҥоһулуннулар. Ол курдук, Николай Неустроев «Балыксыт» уонна Анна Неустроева «Тиргэһиттэр» кэпсээннэрин уобарастара искибиэри киэргэттилэр. Бу үлэлэри Д.Г. Постников айар кэлэктиибэ олоххо киллэрдэ.
ЫСПЫРААПКА:
Николай Денисович Неустроев (1895-1929)— саха литературатын төрүттээччилэртэн биирдэстэрэ, драматург. Балтыта Анна Денисовна Неустроева (1903-1947) ССРС суруйааччыларын сойууһугар сахалартан бастакынан киирбит дьахтар буолар.
edersaas.ru