Дьокуускайга Уустаах Избеков аатынан уулуссаҕа оптуобус тиийэр буолла
Былырыын Дьокуускай куорат Сайсары уокуругун биир уулуссатыгар аатырбыт саха артыыһа, драматург, хореограф, мас ууһа Иоаким Дмитриевич Избеков-Уустаах Избеков аата иҥэриллибитэ. Ааты иҥэриини Уустаах Избеков төрөппүт кыыһа Альбина Иоакимовна туруорсубута.
edersaas.ru
Аны билигин эмиэ Альбина Иоакимовна туруорсуутунан, Билибин уулуссатыттан Гимеиҥҥэ барар уулуссаҕа 15-с нүөмэрдээх оптуобус сылдьар буолла. Бу туһунан Альбина Иоакимовна маннык этэр:
— Сайсары эҥээригэр кыыһым олорор. Дьиэтэ эһэтин уулуссатыттан син чугас. Онтон сатыы оптуобус тохтобулугар тиийэр олус ыарахан этэ. Тохсунньу томороон тымныытыгар, хабыс хараҥаҕа ыттары кытта эбэтэр сааскы бадарааҥҥа массыыната суох кырдьаҕастар уонна оҕолор Геологтар бөһүөлэктэригэр өр хааман тиийэллэрэ. Оттон билигин оройуон олохтоохторугар анаан үс тохтобул баар буолла.
Альбина Иокаимовна Избекова — суруналыыс, Бүтүн Арассыыйатааҕы литературнай уонна суруналыыстар куонкурустарын лауреаттара, Дьокуускайга генерал Виталий Измеров аатынан уулуссаны арыйтарбыта. Кэнники Альбина Иоакимовна көҕүлээһининэн, ИДьМ бэтэрээннэрин сэбиэтин үлэтинэн, Сирияҕа, Афганистаҥҥа, Алжирга сэриилэспит Роман Капитонов аата төрөөбүт Бүлүүтүгэр биир уулуссаҕа иҥэриллибитэ.
Виктория Бястинова, «Саха сирэ» хаһыат, edersaas.ru