Тылбаасчыттарга сэминээр тэрийдилэр

Ааптар: 
Бөлөххө киир:

Сэтинньи 1-4 күннэригэр Хотугулуу-Илиҥҥи федеральнай үнүбэрситиэккэ уус-уран литэрэтиирэни (проза, драма, поэзия) сахалыыттан нууччалыы тылбаастыыр эдэр дьоҥҥо аналлаах үөрэтэр сэминээр ыытыллар.


edersaas.ru

Сэминээр чэрчитинэн лиэксийэлэр уонна быраактыкалыыр дьарыктар буолаллар. Маны Арассыыйатааҕы Үөрэхтээһин академиятын бэрэпиэссэрэ Ирина Сергеевна Алексеева, дассыан Альбина Витальевна Бояркина ыыталлар.
Саха Өрөспүүбүлүкэтэ саха, нуучча култуураларын оннунан хаалларыыга уонна бөҕөргөтүүгэ улахан ситиһиилэрдээҕин, онон Арассыыйа атын эрэгийиэннэригэр уонна национальнай тылларга холобур буолуон сөп диэн Арассыыйатааҕы Үөрэхтээһин академията билинэр. Онон саха тыла тустаах академия инники туруорар тэрээһиннэрин кэккэтигэр киллэриллибитэ. Лектордар ол чэрчитинэн кэлэн сэминээр ыыта сылдьаллар.
Билэлиэгийэ билимин хандьыдаата, Саха тылын истилиистикэтин нууччалыы-сахалыы тылбаас хаапыдыратын дассыана Акулина Васильева: “Арассыыйатааҕы Үөрэхтээһин академиятын Стратегическай киинэ дойду Үөрэҕин уонна наукатын министиэристибэтин сакааһынан, Арассыыйа омуктарын литэрэтиирэлэрин нууччалыы тылбаастаан кинигэ оҥорор. Ол бастакы уопутунан саха литэрэтиирэтэ буолар. ХИНТуоКИ нууччалыы-сахалыы тылбаас уонна истилиистикэ хаапыдыратын кытыннаран, тылбаас кинигэтин бэлэмнииллэр. Биһиги Тимофей Сметанин айымньыларын таллыбыт: бу суруйааччы литэрэтиирэ бары жанрыгар үлэлээн, оскуола бырагырааматыгар киирэр элбэх үтүө айымньылаах эрээри, нууччалыы тылбаастаммыт айымньыта суоҕун кэриэтэ уонна 2019 сылга үбүлүөйэ бэлиэтэниэхтээх. Урут дассыан Н.А Ефремова суруйааччы истиилин анаан-минээн чинчийбитэ уонна хас да сыл Кэбээйи оскуолатын үөрэнээччилэрин кытта бу тиэмэнэн үлэлээбитэ.
Тимофей Сметанин хоһооннорун, “Күөрэгэй” остуоруйатын, “Мэхээлэчээн булчут” кэпсээннэрин, публицистикатын уонна “Лоокуут уонна Ньургуһун” драматын нууччалыы-сахалыы тылбаас салаатын бакалаабырдара, маҕыстырааннара, уһуйааччылара, быйыл үөрэҕи бүтэрбит тылбаасчыттар нууччалыы тылбаастаан И.С. Алексееваҕа, А.В.Бояркинаҕа эрдэ ыыппыттара. Ол тылбаастары сиһилии ырытар сэминээрдэр олус туһалаах буоллулар. Мантан салгыы интэриниэт ситиминэн суруйсуу, вебинар быһыытынан бииргэ үлэлэһэн тылбаас кинигэбитин бэчээккэ бэлэмниэхтээхпит. Бу курдук тылбаас кинигэлэр, Арассыыйатааҕы Үөрэхтээһин академиятын Стратегическай киинин былаанынан, бары өрөспүүбүлүкэлэргэ тахсан, улахан сиэрийэ олохтонуохтаах. Лектордар бу кэлэн ыыппыт үлэлэрин түмэн, атын өрөспүүбүлүкэлэри кытта үлэлииллэригэр туһанар уопут оҥостор санаалаахтар”,   диэн кэпсээтэ.
Оттон дассыан Альбина Бояркина Саха сиригэр үлэтин туһунан санаатын бу курдук үллэһиннэ:
  Бүгүн сэминээрбит иккис күнэ. Тылбаастары кэллиэгэлэрбит көмөлөрүнэн анаалыстыыр кыахтаахпыт. Олус үчүгэй таһымнаахтык тылбаастаммыттар. Бу сэминээргэ дьарыктанарга анаан кэллиэгэлэрбит, айымньылара тылбаастана илик бэртээхэй ааптар Тимофей Сметанин айымньыларын талбыттар. Балар киэҥник биллибэт буолуохтарын сөп. Ол эрээри, сэминээр түмүгүнэн ааптар сүүмэрдэммит айымньыларын таһаарыахпытын сөп.
Биһиги көрбүт тиэкистэрбит, тылбаастарбыт бэчээккэ таһаарарга номнуо бэлэмнэр. Кыратык чочуйан эрэ биэриэххэ наада. Сэминээргэ тиэкистэри уларытан оҥорууга устудьуоннар, кэллиэгэлэрбит көхтөөхтүк кытталлар. Мин санаабар, Саха сиригэр тылбаастыыр таһым олус үрдүк быһыылаах. Биһиги букатын кыра бэлиэтээһиннэри эрэ киллэрэбит. Ити улахан алҕас буолбатах.

Эрдэ, сэминээр эдэрдэргэ туһаайыллар диэбиттэрэ эрээри, мин көрдөхпүнэ, устудьуоннары сэргэ үөрэхтэрин бүтэрбит үлэһиттэр эмиэ үөрүүнэн кытыннылар. Лектордар таһыччы таһымнаах, уопуттаах буолан, үгүс саҥа билиини иҥэрдилэр. Дьиҥэр, уус-уран тылбааска эрэ буолбакка, атын даҕаны хайысханан сэминээрдэри ыыталлара буоллар, тылга сыһыаннаах дьон үөрүүнэн кыттыах этилэр.

Людмила ПОПОВА, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0