Уус-Таатта олохтоохторо Төрүт Сокуоҥҥа уларытыылары киллэриини өйүүллэр
От ыйын 1 күнүгэр буолуохтаах Төрүт Сокуоҥҥа уларытыылары киллэрэр куоластааһын туһунан Таатта улууһун Уус Тааттатын олохтоохторо санааларын үллэстэллэр.
Антонина Неустроева, Уус-Таатта олохтооҕо:
— Олохпут сайдан, урут ылыллыбыт Конституция уларыйар кэмэ кэллэ. Билиҥҥи үйэ сүрүн кыһалҕаларыгар — ыччат үлэлээх буолуутугар, кырдьаҕастар биэнсийэҕэ тахсыыларыгар, мин санаабар, Конституция уларыйыан наада. Сыл аайы биэнсийэ эбиллиэхтээх диэн сөпкө этиллибит уонна дьиэ кэргэн оруола өрө тутуллубута кэрэхсэбиллээх.
Алена Голикова, Уус-Таатта олохтооҕо:
— Арассыыйа Федерациятын Конституциятыгар уларыйыы киирэригэр бары кэлэн куоластыыргытыгар ыҥырабын. Чуолаан ыччаттар биһиги инники олохпутугар, дойдубут сайдарыгар наадалаах дии саныыбын. Хас биирдии үөрэҕин бүтэрбит эдэр киһи сөбүгэр хамнастаах үлэ булара уустук. Конституцияҕа киириэхтээх уларыйыыга хамнас айаҕы ииттинэн олорор алын кээмэйтэн кыра буолуо суохтаах диэн ыйыллыбыта саамай сөп. Эдэр киһи кыра да хамнастан саҕалаатын дииллэр даҕаны, холобур, ипотекаҕа киирэргэ, дьиэлэнэргэ хамнаһыҥ баан ирдэбилигэр эппиэттэһэр буолуон наада.
Валерий Постников, Уус-Таатта олохтооҕо:
— Конституция уларыйыыларын сөптөөҕүнэн ааҕабын уонна барыгытын куоластааһыҥҥа ыҥырабын. Тус бэйэм Төрүт Сокуоҥҥа киирэр уларыйыыга айылҕа харыстабылыгар, аадырыстаах социальнай төлөбүрдэргэ болҕомто ууруллубутун сэргээтим. Судаарыстыбаттан көмөнү чахчы наадыйар киһи ылыахтаах дииллэрэ сөп.
edersaas.ru