Уус Таатта ытык кырдьаҕаһа — Екатерина Гоголева-Эдьиий Кээчэ

Ааптар: 
Бөлөххө киир:

Бу күннэргэ батсаап ситимигэр өрөһөлүү кутуллубут соболоох тыыга олорор эйэҕэс мичээрдээх эбээ хаартыската тарҕанан, үгүс киһи кини кимин билээри социальнай ситимнэринэн токкоолостулар. 

edersaas.ru саайт  ыйыталаһан билбитэ, хаартыскаҕа Таатта улууһун Уус Тааттатын олохтооҕо Гоголева Екатерина Михайловна олорор. Кини бу  кыһын 85 сааһын туолбут. Үйэтин сааһын тухары ыанньыксытынан үлэлээбит. Чугас дьоно бары кинини ытыктаан Эдьиий Кээчэ диэн ааттыыллар. Бэйэтэ төрөппүт оҕото суох эрээри, бииргэ төрөөбүттэрин  оҕолорун барыларын күн бүгүнүгэр диэри хос сиэннэригэр тиийэ көрсөр.

Аймахтара кэпсииллэринэн, ити хаартыска бу сайын тэйиччи сытар өбүгэлэрин сирдэригэр барса сылдьыбытыгар түһэрбиттэр.  Ийэтэ, аҕата олорбут, бэйэтэ төрөөбүт Кырдал диэн сиригэр Екатерина Михайловна 64 сыл буолан баран, бастакытын тиийэ сылдьыбыт.  Бу саас онно сиэн, хос сиэн аймахтара тиийэн өбүгэлэрэ олорбут өтөхтөрүгэр кыра бэлиэ  өйдөбүнньүк  туруорбуттар. Ону көрө тиийэ сылдьыбыт. Кырдал ыраах сытар – Алдан өрүһүнэн моторканан чаастан ордук устан баран, сатыы күөл кытыытынан хааман тиийэҕин — оннооҕор эдэр киһи сылайан тиийэр сирэ. Эдьиий Кээчэлэрэ уһун, киһи илистэр айанын бэрт сэниэлээхтик сылдьыһан дьонун-аймаҕын сөхтөрбүт. Хабырылла күөлүгэр, сиэннэрэ илимниир сирдэригэр, ити хаартыскаҕа түһэн ааспыт.

edersaas.ru

+1
0
+1
0
+1
0
+1
0
+1
0
+1
0
+1
0