Өймөкөөн улууһун Уус-Ньара олохтооҕо Евгений Кривошапкин салайар туристическай кулуубун сэргээн, Таас Кыстаабыкка кэнники сылларга элбэх турист сылдьар.
edersaas.ru
Ол курдук, 2017 сыллаахха, 50 манна киһи сылдьыбыт буоллаҕына, 2018 c. — 200, 2019 c. -250, 2020 с. — 200 турист манна кэлэн, Таас Кыстаабыт хайа кэрэ көстүүтүн сөҕө-махтайа көрбүт-истибит, сибиэһэй салгынынан дуоһуйа тыыммыт.
— Бу сүрүннээн кулун тутар-муус устар ыйдарга сылдьыбыт дьон ахсаана. Сайын, күһүн эмиэ кэлэллэр. Ол гынан баран, ити сааскы ыйдар курдук, оннук элбэх киһи тоҕо анньан буолбатах.
Быйыл саас, былааннаммытынан, 300 курдук киһи буолуохтаах этэ да, сезоммут аҥаарын эрэ үлэлээтибит. Коронавирус дьаҥа мэһэйдээн, элбэх киһи былаанын уларытта. Инньэ гынан, эрдэттэн суруттарбыттара эрээри, үгүс киһи үлэҕэ туолбакка хаалла.
Быйыл Таас Кыстаабыкка баар урукку хайыһар баазатыгар «Уус-Ньара бөһүөлэгэ» МТ баһылыга Александр Роданич үгүс үлэни ыытта: дьиэлэр өрөмүөннэннилэр, хайыһардыыр трасса оҥоһулунна.
Быйылгы сезон уратытынан, туристары хайаҕа таһаарыы быдан эрдэ, олунньуттан саҕаламмыта. Урукку сылларга кулун тутар саҥатыттан дьон сайаапкатын хомуйар эбит буоллахпытына, быйыл «Таас Кыстаабыкка таһаарыҥ» диэн көрдөһүүлээх дьон олунньуга тиийэн кэлбиттэрэ.
Кэлиҥҥи сылларга, өрөбүллэригэр сөп түбэһиннэрэн, олохтоохтор хайаҕа тахсаллара үксээтэ. Төрөөбүт күннэрин, үбүлүөйдэрин, олохторугар бэлиэ күннэрин онно тахсан бэлиэтииллэр. Этиэхтэн кэрэ айылҕаҕа тахсан хаартыскаҕа түһэллэр, сибиэһэй салгыҥҥа сынньаналлар. Биһиги үлэбит диэн — үлэх киирдэ да, анал спортивнай «бураанынан» дьону Таас Кыстаабыкка чыпчаалыгар тиийэ таһаарабыт, — диэн санаатын үллэстэр Евгений Кривошапкин.
Швейцария хайаларыттан туох да итэҕэһэ суох Тымныы полюһун Киһилээх хайалара, омук сириттэн тиийэ туристары угуйар буоллулар. Ол да иһин буолуо, улуус уонна Уус-Ньара бөһүөлэгин дьаһалталара туризмы сайыннарыыга Таас Кыстаабыкка баар хайыһар баазатын тупсарар, саҥардар былааннаахтар. Сэбиэскэй кэмҥэ «Квант» хайыһар баазатын геологтар бэйэлэригэр анаан оҥостубуттара. Хас да сынньанар дьиэ туппуттара, хайа чыпчаалыгар тиийэ массыына суолун оҥорбуттара. Бу бэртээхэй бааза 90-с сылларга, уларыта тутуу кэмигэр, ыһыллан-тоҕуллан, ким да сылдьыбат буолбута. Ону, кэлиҥҥи сылларга, Евгений Кривошапкин туристическай кулууба туристары угуйан, урут геологтар таптаан сынньанар сирдэригэр аатын-уолун төнүннэриэх курдук буолла.
Елена ПОТОЦКАЯ, «Саха сирэ» хаһыат, edersaas.ru
Евгений Кривошапкин хаартыскаҕа түһэрииэрэ.