Быйыл күһүн улуус киинин аҕыс олорор дьиэлэрин уонна тэрилтэлэрин истиэнэлэрин саха үһүйээннэрин уонна остуоруйаларын дьоруойдара уруһуйдаммыт сүүнэ улахан ойуулара үгүс дьону соһуппута.
edersaas.ru
Бу «мурал» диэн истиэнэҕэ уруһуй көрүҥүн саҥа көрөр, билсэр олохтоохторго олус сонун көстүү этэ. Улуус киинин маннык киэргэтии идиэйэтэ аан бастаан улуус баһылыга Иннокентий Сивцевкэ кэлбитэ.
— Бастаан Уус Ньараҕа ахсынньыга үлэлии кэлэрбэр бөһүөлэк ис көстүүтэ хайдах эрэ киһи кута-сүрэ тохтообот этэ. Кыһыҥҥы кэмҥэ Тымныы полюһун кэрэ айылҕатын, хайатын кытта дьүөрэлии көстөр дьиэ-уот суох курдуга. Бу туһунан бөһүөлэк баһылыга Александр Роданичка санаабын тиэрпитим. Өрөспүүбүлүкэҕэ дьиэ тас истиэнэтин уруһуйдаан киэргэтэр холобур баарын эппитим.
Сүбэлэһэн баран, өрөспүүбүлүкэтээҕи бөһүөлэктэри тупсарар «LETO YAKUTIA» кииҥҥэ тахсыбыппыт. Кинилэр биһигини Ижевскэй худуоһунньуктарын кытта билиһиннэрбиттэрэ.
Ити курдук Удмуртия Өрөспүүбүлүкэтиттэн биһиги Дмитрий Костицыны, Сергей Головины, Владислав Качуровы кытта сибээстэспиппит.
Уолаттар бэйэлэрин массыыналарынан Ижевскэйтэн 12 күн устата айаннаан кэлэн, атырдьах ыйын бүтэһигэр уонна балаҕан ыйын саҥатыгар икки нэдиэлэ устата Уус Ньара дьиэлэрин уонна тэрилтэлэрин истиэнэлэрин уруһуйдаан киэргэппиттэрэ.
Билигин кыһыҥҥы маҥан хаарга Уус Ньара дьиэлэрин истиэнэлэрэ олус кэрэ көстүүлэнэн, олохтоохтор уонна ыалдьыттар санааларын көнньүөрдэллэр.
Елена ПОТОЦКАЯ, «Саха сирэ» хаһыат», edersaas.ru
Хаартыскаҕа Любовь Кривошапкина түһэриитэ.