Бэс ыйын 12 күнэ — Арассыыйа күнэ. Бу күн дойду үрдүнэн элбэх тэрээһин ыытыллыаҕа. Өймөкөөн улууһа ол тэрээһиннэртэн хаалсыбат.
Александр ТАРАСОВ, https://edersaas.ru
Ити ураты бырааһынньыкка кытта бүгүн Дьокуускайтан сөмөлүөтүнэн биллэр-көстөр ырыаһыт Виктория Цыганова Уус Ньараҕа көтөн тиийдэ.
Кэлиҥҥи кэмҥэ киин сиртэн ырыаһыттар анаан-минээн Уус Ньараҕа кэнсиэртии кэлэллэрэ элбээтэ. Быйыл Кыайыы күнүгэр Уус Ньара «Металлург» култуура киинигэр байыаннай-патриотическэй ырыалары кыайа-тутан ыллыыр «СССР» уонна сэбиэскэй кэм саҕана оччотооҕу эстрадаҕа рок-музыка элимиэннэрин аан бастакынан киллэрбит «Земляне » бөлөхтөр үс күн толору кэнсиэртээбиттэрэ. Олохтоохтор Кыайыы күнүгэр байыаннай-патриотическэй ырыалары дуоһуйа истибиттэрэ.
Оттон Арассыыйа күнүгэр аны Виктория Цыганова лирическэй, патриотическэй ырыаларын бу тутан олорон истэн астыныахтара. Маннык хабааннаах кэнсиэртэр Өймөкөөн улууһугар элбэх көмүһү хостуур «Янтарь» хампаанньа бөлөҕүн көмөтүнэн буолаллар.
Артыалларга — кэнсиэр
Патриотическэй ырыалары ыллыыр «СССР» бөлөх Уус Ньараҕа бэҕэһээ кэлэн, артыаллары кэрийэн, оробуочайдарга кэнсиэртии сылдьар. Бүгүн «Хаҥалас» тэрилтэ көмүсчүттэригэр бөртөлүөтүнэн тиийэн, оробуочайдарга кэнсиэр туруоруохтара.
Александр ТАРАСОВ, https://edersaas.ru