Атырдьах ыйын 5 күнүгэр Өймөкөөн улууһун киинэ Өймөкөөн 80 сыллаах үбүлүөйүн бэлиэтиир.
edersaas.ru
Бу күннэргэ үөрүүлээх бэлиэ түгэнинэн сибээстээн, олохтоохтор биир ытык сирдэрэ – Успения Сибэтиэй Богородицатын храмын өрөмүөнэ үгэннээн турар кэмэ. Таҥара дьиэтэ уон биир сыллааҕыта тутуллан киирбитэ. Оччолорго тутуу матырыйаала кэмчи буолан, сыыһа-халты тутууттан сылтаан, дьиэ биллэ хамнаабыт. Онуоха эбии бу сыллар усталарыгар буолбут улахан халааннар, Таҥара дьиэтин эмиэ тумнубатахтара.
— Тутуллубутун тухары дьиэҕэ хапытаалынай өрөмүөн ыытылла илик. Онон Уус-Ньара үбүлүөйдээх бэлиэ түгэнигэр түбэһиннэрэн, өрөмүөн ыытары өйүүрүгэр улуус бөдөҥ промышленнай тэрилтэтин, “Хаҥалас” көмүс хостуур хампаанньатын салайааччыта Александр Карасьтан көрдөспүппүт. Александр Михайлович биһиэхэ өрүү көмөлөһөр. Кини өйөбүлүнэн “воскреснай оскуола” аспыппыт. Бу да сырыыга тылбытын быһа гыммакка, төһө да ыктарыылаах көмүс сууйуутун сезона буоллар, уон биир сыл буолан баран, Таҥара дьиэтэ дьэ өрөмүөннэнэн эрэр, — диэн храм үлэһитэ, аҕабыыт Феодор Никитюк кэпсиир.
Меценат Александр Карась үп көрөн, 17 киһилээх тутуу биригээдэтэ бырааһынньыктааҕы тэрээһиннэр саҕаланыахтарын иннинэ Таҥара дьиэтин акылаатын цеменинэн кытаатыннарда, кырыыһатын уларытта. Бу күннэргэ өрөмүөн үлэтэ түмүктэниэҕэ.
Елена ПОТОЦКАЯ, «Саха сирэ» хаһыат, edersaas.ru