Уопсастыба

Уус-Ньараҕа — көҕөрдүү үлэтэ



Тулалыыр эйгэни харыстыыр күнү көрсө Өймөкөөн улууһун киинин Уус-Ньаратааҕы «Металлург» Култуура дьиэтин  кэлэктиибэ көҕөрдүү үлэтин ыытта.

 edersaas.ru

 Ол курдук, «Халыма» федеральнай суолун Дьокуускайдыыр туһаайыытыттан хатыҥ үүнэр сириттэн (чугаһынан оннук сир суох) култууhа үлэһиттэрэ 30 хатыҥчааны аҕалан, Култуура дьиэтин тулатыгар олортулар.

Көлөнөн Уус-Ньара бөһүөлэгин баһылыга Александр Роданич хааччыйда.

Тыйаатыр устуудьуйатын сэбиэдиссэйэ Любовь Иванова иһитиннэрбитинэн, эһиил «Металлург» Култуура дьиэтэ 60 сыллаах үбүлүөйүн бэлиэтиэҕэ.

Биллэн турар, бу үбүлүөй Өймөкөөн улууһун култууратын уонна духуобунаһын устуоруйатыгар биир дьоһуннаах бэлиэ даатанан буолара саарбаҕа суох. Бу сыллар тухары Култуура храмыгар араас норуоттар култууралара уонна үгэстэрэ биир тэҥник тутуллан сайдан кэллэ. Манна дойдуга тиийэ аатырбыт айар кэлэктииптэр төрүттэммиттэрэ. Өймөкөөн улууһун чаҕылхай талааннаах «сулустара» кынат анньынан тахсыбыттара. Онон бу хатыҥнары олордон, биһиги «Металлург» Култуура дьиэтин үбүлүөйдээх тэрээһиннэрин саҕалаатыбыт, — диэн кэпсээтэ Любовь Степановна.

Кэрэхсэбиллээҕэ баар, бу тэрээһиҥҥэ оҕолор эмиэ кыттыыны ыллылар.

Кырдьык да, сотору кэминэн бу хатыҥнар үүнэн тахсан, сөрүүн сайыҥҥы тыалга күп-күөх сэбирдэхтэринэн тэлимнээн, сырдыгы, кэрэни уонна үйэлээҕи кэрэһэлиэхтэрэ.

Елена ПОТОЦКАЯ, «Саха сирэ» хаһыат, edersaas.ru

 

Хаартыска — «Металлург» КДь тиксэриитэ.

 

0
0

Санааҕын суруй