Өймөкөөн улууһун киинигэр Уус-Ньараҕа биир сытыы боппуруоһунан Сбербаан банкоматтарын бытаан үлэтэ буолар.
edersaas.ru
Тэрилтэлэр дьон хамнаһын пластиковай карталарга ыытар буолан, дьон банкоматтары маныырга күһэллэллэр.
— Бүгүҥҥү күҥҥэ маҕаһыыннарга пластиковай картанан төлөбүрү 42 предприниматель оҥорор. Сбербаан ПАО Саха сиринээҕи филиалын салайааччыта Алексей Зезюлин миэхэ эрдэттэн бэлэмнээбит статистика докумуонунан Уус-Ньараҕа баар банкоматтар үлэлэрин билиһиннэрдэ.
Улуус киинигэр 6 банкомат үлэлии турар. Бары толору кээмэйдээх үлэни оҥоро тураллар эбит. Ол курдук, холобура, «Магаданэнерго» тэрилтэҕэ турар банкомат соругун — 87%, Сбербаан филиалын дьиэтигэр турар банкомат — 95% толороллор эбит. Маннык хартыына – хас биирдии банкомакка. Сбербаан управляющайа биир сонун бырайыагы олоххо киллэрэн эрэллэрин билиһиннэрдэ.
Ол курдук, Уус-Ньараҕа бары банкоматтары хомуйан, Сбербаан филиалын дьиэтигэр туруораары сылдьаллар эбит. Оччотугар дьон, Дьокуускай куоракка курдук, биир сиргэ кииннэнэн пластик картаттан харчыларын устуохтарын сөп. Бу көрүҥ биир банкомакка уочараты үөскэппэт туһугар толкуйдаммыт. Бырайыак үөһээҥҥи салалта сөпсөһүүтүгэр сылдьар. Сотору кэминэн күһүөрү олоххо киириэҕэ, — диэн Сбербаан Саха сиринээҕи филиалын кытта кэпсэтиитин түмүгүн туһунан иһитиннэрдэ Өймөкөөн улууһун баһылыга Михаил Захаров.
Ити курдук, сотору кэминэн Өймөкөөн улууһун киинигэр Уус-Ньараҕа биир сиргэ кииннэммит банкоматтар үлэлээн, олохтоохтор пластик картаттан харчыларын холкутук устуохтарын сөп.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа ааптар түһэриитэ.