Үтүө дьулуур уонна волонтер сылыгар анаан Өймөкөөн улууһун ааттаах-суоллаах предпринимателлэрэ Владимир уонна Татьяна Гороннар уопсастыбаннай тэрээһиннэргэ өрүү актыыбынайдык кытталлар. Кинилэр бэйэлэрин баҕаларынан «Мин аҕам — бастыҥ балыксыт» диэн тэрээһини ыыттылар.
edersaas.ru
Куонкурус сүрүн соруга — үүнэр көлүөнэҕэ аҕа оруолун үрдэтии. Предпринимателлэр «У Татьяны» бэйэлэрин маҕаһыыннарын аатынан батсаапка анал бөлөх тэрийбиттэрэ. Онно аҕа оҕотун кытта балыктыы сылдьан түспүт видеоматырыйаалын уонна хаартыскатын ыытан кытыннылар. Биллэн турар, кылаабынай судьуйанан куонкуруһу көҕүлээччи ыал аҕата, преприниматель Владимир Горон бэйэтэ буолла.
— Кэргэннии Гороннар дьүүллүүр сүбэ быһыытынан кыттааччылары үгүстэрин бэлиэтээтилэр. Ол курдук, «Саамай улахан балык», «Киһи үөйбэтэх дьикти балыгын хаптарыы» курдук номинациялары олохтоон, куонкуруска кыттааччылар сүргэлэрин көтөхтүлэр, — диэн суруйар СИА-ҕа улуустааҕы «Северная заря» хаһыат кэрэспэдьиэнэ Ксения Лыгагина.
«Мин аҕам — бастыҥ балыксыт» куонкурус кыайыылаахтарынан Тимур Мержоев уонна Владимир Кашин буоллулар.
Иккис миэстэҕэ Андрей Пальчук уонна Валерий Рыжков тигистилэр. Үһүс миэстэҕэ Константин Белошенко уонна Юрий Григорьев таҕыстылар. Кыайыылаахтарга тэрийээччилэр балыксыттарга аналлаах туһалаах бириистэри туттардылар.
Өймөкөөн улууһа 60-тан тахса араас омук олорор интернациональнай оройуонунан буолар. Онон Үтүө дьулуур уонна волонтер сылынан сибээстээн, маннык дьону сомоҕолуур тэрээһиннэр ыытыллаллара атыттарга — бастыҥ холобур.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Ксения Лыгагина түһэриитэ.