Уус Ньара олохтоохторо дьиэҕэ олоруу эрэсиимин кытаанахтык тутуһаллар

Бу күннэргэ ыам ыйынааҕы бырааһынньыктарынан сибээстээн, Өймөкөөн улууһунааҕы сыстыганнаах дьаҥы бохсор суһал ыстаап тыаҕа тахсан, дьон сынньанар, дьаарбайар сирдэрин бэрэбиэркэлээтэ.

Суһал ыстаап салайааччытын солбуйааччы Станислав Глазковы кытта бэрээдэги араҥаччылааччылар уонна оройуоннааҕы «Северная заря» хаһыат суруналыыһа Юлия Фролова сырытта.

Өскөтүн урукку сылларга Маай бырааһынньыктарыгар баччаларга дьон дьаарбайар сирдэрэ толору киһи буолар буоллаҕына, бу күннэргэ оройуон киинин Уус Ньара олохтоохторо сынньанар сүрүн сирдэрэ эриэйдэ хамыыһыйатын кураанаҕынан көрүстүлэр.

Ити курдук, Уус Ньара олохтоохторо коронавирус курдук кутталлаах сыстыганнаах ыарыы өрө турбутун, Өймөкөөн улууһа  эмиэ кутталлаах зонаҕа киирбитин кытаанахтык өйдөөбүттэр. Онон, бу күннэргэ оройуон киинин олохтоохторо дьиэҕэ олоруу эрэсиимин кытаанахтык тутуһаллар.

Елена ПОТОЦКАЯ, «Саха сирэ» хаһыат, edersaas.ru

Хаартыска — Юлия Фролова.