Нэһилиэнньэҕэ куттал суох буолуутун хааччыйар судаарыстыбаннай кэмитиэти салайааччы Дмитрий Лепчиков уонна кини маҥнайгы солбуйааччыта Иннокентий Андросов Уус Майаҕа саҥа баһаарынай депо арыллыытыгар онлайн-кыттыыны ыллылар.
Үөрүүлээх тэрээһинҥҥэ Саха сиригэр судаарыстыбыннай баһаартан сэрэхтээх буолуу сулууспа салайааччытын э.т. Руслан Босиков кытынна. Кини 1-кы №-дээх баһаарынай чаас хамаандатын үлэтэ саҕаламмытынан эҕэрдэлээтэ.
— Бу депону тутуу 2013 сыллаахха саҕаланан баран тохтуу сылдьыбыта, онтон 2019 сылга Ил Дархан Айсен Николаев өйөөн, үлэ сөргүтүллүбүтэ. Саха Өрөспүүбүлүкэтигэр куттал суох буолуутун хааччыйар судаарыстыбыннай кэмитиэт олохтоох былааһы кытта ыкса үлэлээһиннэрин түмүгүнэн бу тутууну анаммыт болдьоххо үлэҕэ киллэрдэ. Биир сыл иһигэр олус наадалаах, дьону уоттан харыстыыр эбийиэк үлэҕэ киирдэ, — диэн Дмитрий Лепчиков эттэ.
Саҥа тутуллубут депо түөрт массыынаҕа анаммыт киириилээх, итиэннэ манна диспетчерскэй хос, үөрэнэр кылаас уонна баһаарынайдар аһыыр, сынньанар сирдэрэ баар.
Егор Карпов, «Саха сирэ» хаһыат, edersaas.ru