Быйыл сааскы халаан содулуттан Уус Маайа улууһун Тумул, Күп, Эдьээн уонна Элдьикээн нэһилиэктэригэр 125 сылгы өлбүтэ. Оттонор ходуһалар ууга былдьанан, оттооһун былаана толоруллубатаҕа.
Халаан содулун туоратар хамыыһыйаҕа нэһилиэнньэттэн 56 сылгыны атыылаһарга сайаапка киирбитэ. Ол иһин улуус дьаһалтата «Туймаада» ҮАПК-тан икки сылга төлүүр болдьоххо 2 мөл 300 тыһ. солк. суумалаах сойуому көрдөөбүтэ.
Бу күннэргэ тыа хаһаайыстыбатын улуустааҕы управлениетын начальнига Гаврил Борохин Амма улууһугар сылдьан, Абаҕа нэһилиэгэр И.Я.Строд аатынан тыа хаһаайыстыбатын кэпэрэтиибиттэн сылгы атыылаһар итиэннэ Чакыр нэһилиэгин “Кэскил” ХЭУо-ттан от атыылаһар туһунан кэпсэттэ. Сыана чуолкайданнаҕына уонна Амма өрүс суола аһылыннаҕына, оту таһыы саҕаланыахтаах. Онуоха тиэйии-таһыы төлөбүрэ 2019 сылга оҥоһуллуоҕа: ороскуот 70 %-ын Тыа хаһаайыстыбатын министиэристибэтэ, 30 %-ын улуус уйунуохтара.
Раиса СИБИРЯКОВА, «Саха сирэ» хаһыат, edersaas.ru