Букатын аҕыйах хонугунан, тохсунньу 29 күнүгэр Уус Маайаҕа 400 миэстэлээх саҥа оскуола үлэҕэ киирэн эрэр. Оскуола тутуута икки сыллааҕыта саҕаламмыта. Саҥа оскуола тутуллан, Уус Маайа улууһун үөрэнээччилэрэ бука бары биир симиэнэҕэ көстүлэр.
edersaas.ru
Санатан эттэххэ, дойду бэрэсидьиэнэ Владимир Путин икки сыллааҕыта оскуолалары барыларын биир симиэнэҕэ көһөрүү туһунан эппитэ. Ити, бастатан туран, үөрэх хаачыстыбатыгар дьайыахтааҕа. Тустаах дьаһал олоххо киириитигэр анал бырагыраама ылыныллыбыта, дойду хааһынатыттан үп көрүллүбүтэ. Саха сирэ итинтэн эмиэ хаалсыбат. Кэккэ сылларга тутуу күүскэ баран, Саха сиригэр сыллата уоннуу оскуола үлэҕэ киирэр. СӨ үөрэҕин уонна наукатын миниистирин бастакы солбуйааччы Феодосия Габышева: “Оскуолалары биир симиэнэҕэ көһөрүүгэ дойду үрдүнэн былааннаах үлэ бара турар. Биһиги ити хамсааһыҥҥа киирэн, 2016 сылтан биир симиэнэҕэ көһөрөр дьаһаллары ылбыппыт. Бырагыраама икки түһүмэҕинэн барар. Бастакы түһүмэххэ, 2020 сылга диэри алын уонна улахан кылаас үөрэнээччилэрин барыларын биир симиэнэҕэ көһөрүөхтээхпит. Онтон иккис түһүмэххэ, 2025 сылга диэри, орто сүһүөх
(5-9 кылаас) оҕолорун көһөрүөхтээхпит. Уонна иккис түһүмэххэ 2021-2025 сылларга саахалланар туруктаах оскуолалар оннуларыгар саҥа эбийиэктэри тутуохтаахпыт”, — диэн бэлиэтээтэ.
Уус Маайа бөһүөлэгин оскуолата Саха Өрөспүүбүлүкэтин инвестиционнай бырагырааматынан тутулунна. Улууска тарбахха баттанар биир улахан оскуола буолан, иккис симиэнэни суох оҥорууну олоччу быһаарда. Уопсай иэнэ – 1907,1 кв.м. Ирдэбил быһыытынан көрүллэр кылаастары, хостору сэргэ, үлэ уруогар анал, омук тылыгар лингафоннай тэриллэрдээх, химия, физика уруогар уопут оҥорорго лабораторнай кэбиниэттэрдээх. Быһатын эттэххэ, оскуола ис-тас бараана барыта аныгы ирдэбилинэн оҥоһулунна.
“Бу иннинэ Уус Маайа бөһүөлэгин оскуолата саахалланар туруктаах буолан, оҕолор алын кылаастар мас, кыра оскуолаларыгар икки симиэнэнэн үөрэнэ олорбуттара. Оскуола 20 кылаастаах, 408 үөрэнээччилээх. Саҥа оскуола үлэҕэ киирэн, улуус үрдүнэн биир симиэнэҕэ көстүбүт”, — диэн улуустааҕы үөрэх управлениетын уопсай үөрэхтээһиҥҥэ салаатын салайааччыта Олеся Карелина иһитиннэрдэ.
Итиннэ даҕатан эттэххэ, тустаах оскуола 2017 сылга киирбит оскуолалартан саамай улаханнара буолар. Үс этээстээх, дьэрэкээн өҥнөөх таас оскуола үөрэнээччилэри сырдыкка, билиигэ ыраахтан угуйар. Дойду салайааччыта Владимир Путин оскуола үөрэнээччилэрин барыларын биир симиэнэҕэ көһөрүүгэ дьаһала дьайда диэн бэлиэтиир тоҕоостоох. Инньэ гынан, олохтоохтор, үөрэнээччилэр баҕа санаалара туолла.
Людмила ПОПОВА, “Саха сирэ” хаһыат, edersaas.ru