Бу күннэргэ Уус Маайа улууһун баһылыга Александр Антипин нэһилиэктэринэн сылдьан, халааҥҥа бэлэмнэнии үлэтин кытта билистэ.
edersaas.ru
Улуустааҕы муниципалитет пресс-сулууспата иһитиннэрэринэн, баһылыгы кытта оройуон борокуруора Александр Смирников, дьаһалта ыксаллаах быһыы-майгы отделын исписэлииһэ Иван Архипов кыттыыны ыллылар.
Бастатан туран, хамыыһыйа ууга барыан сөптөөх, 2018 с. улахан халааҥҥа ылларбыт Эльдьикээн, Күп, Эдьээн нэһилиэктэригэр сырытта. Олохтоох дьаһалталар баһылыктара бэлиэтээбиттэринэн, халааҥҥа анал былаанынан сөптөөх үлэ барар.
Саппаас аһынан-үөлүнэн, уунан хаһааммыттар, быстах кэмҥэ олорор балааккалар бэлэмнэр. Наадалаах түбэлтэтигэр дьону эвакуациялыыр пууннар кэмигэр аһыллыахтара. Сүөһүнү көһөрөр сирдэр эмиэ бэлэмнэр.
Күп нэһилиэгин баһылыга Константин Иванов мууһу бүөлүүр даамба алдьанар түбэлтэтигэр өрөмүөннүүр-оҥорор матырыйаал аҕалыллыбытын иһитиннэрдэ. Бу күннэргэ «Артемида» ХЭУо-ны кытта дуогабардаһан, өрүс икки учаастагар мууһу чаараһатар үлэни ыыппытар.
Эдьээн нэһилиэгин баһылыга Анастасия Адамова бэлиэтээбитинэн, сыл аайы үөрүйэх дьон быһыытынан, халааҥҥа бэлэмнэнии тэрээһин үлэлэрин кэмигэр ыыталлар. Дьону сэрэтэр «КСЕОН» аппаратураны өрөмүөннээн саҥардыбыттар. Халаан кэмигэр наада буолуон сөптөөх убаҕас оттугу уонна эми-тому эбии аҕалбыттар. «Кээлбик» учаастак диэки мууһу хараардыы үлэтэ барбыт.
Оскуола аактабай саалатыгар дьону эвакуациялыыр пуун бэлэм. 2018 с. биэрэк аттыгар турбут сибээс лиинийэтин муус үнтү солоон барбыт. Билигин ол сиргэ Уус Маайатаҕы ЛТЦ учаастагын үлэһиттэрэ саҥа лиинийэни өрөмүөннээн, саҥарда сылдьаллар. «Билайн» оператордара соторутааҕыта сибээһи кэлэн бэрэбиэркэлээн барбыттар. Оройуон борокуруора Александр Смирников олохтоох дьаһалталар халааны куттала суох аһарыыга үлэ былаанын тустаах докумуоннарын бэрэбиэркэлээтэ.
Анал хамыыһыйа улуус олохтоох дьаһалталара халааны этэҥҥэ аһардыыга бэлэмнээх олороллорун бэлиэтээтэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Юрий Таюрскай түһэриитэ.