—Ис сүрэхпиттэн улаханнык үөрэн туран оҕолору, кинилэр төрөппүттэрин уонна оҕо саадын кэлэктиибин бу кэрэ-биэлиэ күн үүммүтүнэн эҕэрдэлиибин. Хаарбах туруктаах дьиэттэн аныгы үйэ уһуйааныгар көһөр — улахан үөрүү. Бу уһуйаан иитиллээччилэрэ төрөөбүт дойдуларын, өрөспүүбүлүкэлэрин таптыыр, бэриниилээх дьон буола улааталларыгар баҕарабын, — диэтэ Ил Дархан. Тутууну өйөөбүт норуот дьокутаатыгар, тэрилтэ генеральнай дириэктэригэр Сергей Ларионовка оройуону сайыннарыыга, уһуйааны тутууга көмөтүн иһин махтанна.
—Пандемия уустук кэмигэр туруоруллубут соругу кыайа туппут тутааччыларга, бырайыакка олохтоохтор кыттыбыттарыгар махтанабын. Саҥа уһуйааннаммыккытынан кэлэктииби, кырачааннары, төрөппүттэри эҕэрдэлиибин. Дьиэҕитин-уоккутун харыстааҥ, туохха эмэ мунаардаххытына-тэнээрдэххитинэ ыйытан иһиҥ. Дойдулааххыт буоларбынан, үөрүүнэн көмөлөһөргө бэлэммин«, — диэтэ Ларионов.
Саҥа уһуйаан 60-80-с сыллардааҕы икки эргэ куорпус оннугар тутуллубут. 1 605,54 кв. м. иэннээх икки мэндиэмэннээх уһуйааҥҥа алта бөлөх киирэр, музыкаҕа үөрэтэр, физкултууралыыр саалалардаах, медицинскэй хостоох, аһылыгы бэлэмниир аныгы куукуналаах, оранжереялаах.
Тутуу ис оҥоһугар нэһилиэккэ элбэх омук олороро, айылҕа уратылара, Алдан өрүс чугаһа барыта учуоттаммыт. Уһуйаан таһыгар оҕолору оонньотор былаһааккалар бааллар.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскаҕа түһэриилэрэ